ԵՊՀ և ԿԵՀ Հայաստանի շրջանավարտները խնդրում են ԵՊՀ-ին՝ վերանայել որոշումը

ԵՊՀ և ԿԵՀ Հայաստանի շրջանավարտները հայտարարություն են տարածել առ այն, որ ԵՊՀ-ն հրաժարվել է հյուրընկալել և մասնակցել Կենտրոնական եվրոպական համալսարանի Արևելյան միջերկրական ուսումնասիրությունների կենտրոնի կազմակերպած միջազգային գիտաժողովին։ Տեքստին ամբողջությամբ ծանոթացեք ստորև.

«Հայտնում ենք մեր խորին ափսոսանքը և անհանգստությունը Երևանի պետական համալսարանի հայտարարության վերաբերյալ, որով վերջինս հրաժարվել է հյուրընկալել և մասնակցել Կենտրոնական եվրոպական համալսարանի Արևելյան միջերկրական ուսումնասիրությունների կենտրոնի «Կովկասը և Բյուզանդիան ուշ հնադարից մինչև միջնադար» ծրագրի տարեկան միջազգային գիտաժողովին:

Տեղակայված լինելով Բուդապեշտում, Հունգարիա, Կենտրոնական եվրոպական համալսարանը հավատարմագրված է թե ԱՄՆ-ում, թե Եվրամիությունում և հանդիսանում է միջազգային համալսարան, և ոչ հունգարական: Ավելին, գիտաժողովը պլանավորվում է անցկացնել Երևանում, ոչ թե Բուդապեշտում:

Հասկանալով և կիսելով հանդերձ մեր հայրենակիցների զգացմունքները, կապված Հունգարիայի կառավարության անթույլատրելի որոշման հետ, մենք չենք կարծում, թե միջազգային ակադեմիական և մշակութային hարթակներից դուրս մնալը ամրապնդում է մեր դիրքորոշումը կամ նպաստում ստեղծված իրավիճակի հանգուցալուծմանը: Ավելին, մենք գտնում ենք, որ անկախ ապագա քաղաքական և դիվանագիտական պարզաբանումներից միջազգային ակադեմիական և մշակութային երկխոսությունն ու համագործակցությունը չպետք է վտանգվի:

Հաշվի առնելով վերևոգրյալը՝ մենք դիմում ենք Երևանի պետական համալսարանին՝ խնդրելով վերանայել խնդրո առարկա որոշումը և մասնակցել գիտաժողովին: Մենք համոզված ենք, որ այս իրադրությունում ակադեմիական համայնքները կարող են օգնել հաղթահարելու այս բարդ շրջանը, և որ համագործակցությունը երկու բարձրագույն կրթական հաստատությունների միջև պետք է ամրապնդվի և խորանա»: