Տեղի ունեցավ «Փոփոխվող աշխարհ. Հայացք Երեւանից» պարբերականի երկրորդ համարի շնորհանդեսը

Ռազմավարական եւ ազգային հետազոտությունների հայկական կենտրոնում (ՌԱՀՀԿ) տեղի ունեցավ «Փոփոխվող աշխարհ. Հայացք Երեւանից» եռամսյա պարբերականի երկրորդ համարի շնորհանդեսը, որին ներկա էին փորձագետ-վերլուծաբաններ, լրագրողներ եւ հասարակայնության ներկայացուցիչներ:

Շնորհանդեսը բացեց եւ ներկաներին ողջունեց ՌԱՀՀԿ գործադիր տնօրեն Կարապետ Կալենչյանը:

Իր խոսքում ՌԱՀՀԿ գիտական տնօրեն, «Փոփոխվող աշխարհ. Հայացք Երեւանից» հանդեսի գլխավոր խմբագիր Մանվել Սարգսյանը նշեց, որ սույն թողարկումը գրեթե ամբողջությամբ նվիրված է ԱԺ 2012թ. մայիսի 6-ին տեղի ունեցած ընտրություններին առնչվող կարեւորագույն հանգրվանների ու անցքերի վերլուծությանը, ինչպես նաեւ հետընտրական Հայաստանի ներքաղաքական զարգացումների լուսաբանմանը: «Ի՞նչ նշանակություն ունեն, ընդհանրապես, ընտրությունները Հայաստանում, արդյո՞ք նոր իրավիճակ ստեղծվեց վերջին խորհրդարանական ընտրությունների արդյունքում, ի հայտ եկա՞ն արդյոք պայքարի նոր, արդյունավետ ձեւեր: Այս եւ նմանօրինակ շատ հարցերի պատասխաններ կարելի է գտնել մեր հանդեսի երկրորդ համարում»,- ասաց Սարգսյանը: Ըստ նրա, եթե երկրում չի գործում ազատ ընտրության մեխանիզմը, ապա կուսակցական գործունեությունը լիովին իմաստազրկվում է: Այս միտքն է նա զարգացրել համարում զետեղված իր հոդվածում:

Այնուհետեւ ելույթ ունեցան պարբերականի 2-րդ համարի հոդվածագիրներից Արմինե Ղազարյանը, Զարուհի Հովհաննիսյանը եւ Լուսինե Պետրոսյանը' ներկայացնելով իրենց հետազոտությունների հանգուցային դրույթները: Որոշ հարցադրումներով հանդես եկան ու հավելյալ պարզաբանումներ ստացան Սահմանադրական դատարանի գլխավոր մասնագետ, իրավաբան Լիաննա Մկրտչյանը, «Հայաստանի Հանրապետություն» թերթի մեկնաբան Էմմա Բեգիջանյանը, «Աշխարհն առանց արգելքների» ՀԿ իրավաբան Աշոտ Սարգսյանը, ՀՀ-ում Արցախի ներկայացուցչության քաղաքական բաժնի վարիչ Աշոտ Մելյանը, «Թրանսփերենսի ինթերնեյշնլ» հակակոռուպցիոն կենտրոնի մասնագետ Վախթանգ Սիրադեղյանը եւ «Արմինֆո» լրատվական գործակալության լրագրող Նանա Մարտիրոսյանը:

«Փոփոխվող աշխարհ»-ի հերթական թողարկումը բացվում է ՀՀ Սահմանադրական դատարանի անդամ Վալերի Պողոսյանի հարցազրույցով, որտեղ, ի մասնավորի, դիտարկվում են արդյունավետ կերպով իշխանություն ձեւավորելու կամ փոխելու' ՀՀ քաղաքացիների իրավունքի, մեզանում պատգամավորի ետկանչի մեխանիզմի, ինչպեսեւ հանրագրի (պետիցիայի) ինստիտուտի ներդրման եւ այլ հնարավորությունների հետ կապված հարցեր:

ԱԺ ընտրությունների հենքին լայնորեն արծարծվում են քաղաքական ուժերի ակնկալիքների, հետընտրական իրավիճակի մոդելավորման յուրահատկությունների ու ընտրությունների հոգեբանական նրբերանգների թեմաները: Կան կարեւոր անդրադարձներ ՀՀ-ում քաղաքական պայքարի ձեւերին եւ կուսակցական գործունեության տրամաբանությանը: Հատուկ բաժին է նվիրվում ԱԺ ընտրություններին աղերսվող փաստական նյութին' իրադարձությունների, տվյալների, դիտորդական արձագանքների եւ այլ գործընթացների ներկայացմանը:

Հիշեցնենք, որ ՌԱՀՀԿ-ի նոր հրատարակությունը նպատակ ունի տարածաշրջանային եւ համաշխարհային զարգացումների լույսով վերհանել այսօրվա ու վաղվա առանցքային խնդիրների, մարտահրավերների եւ հեռանկարների համայնապատկերը, առաջարկել թարմ գաղափարներ ու այլընտրանքային լուծումներ:

Ռազմավարական եւ ազգային հետազոտությունների հայկական կենտրոնը 1994թ. հիմնադրել է ՀՀ առաջին արտգործնախարար Րաֆֆի Կ. Հովհաննիսյանը՝ արժանանալով հայաստանյան եւ Սփյուռքի աջակիցների լայն շրջանակների զորակցությանը: Հետեւելով համաշխարհային զարգացումներին, գիտելիքների հիմքեր խարսխելով, հանրության հետ երկխոսություն ծավալելով՝ Կենտրոնը հետխորհրդային տիրույթում հանդես է գալիս որպես երկրաքաղաքական ստեղծագործական մտածողություն ձեւավորող եւ միջազգային միջավայրի համապարփակ ընկալմանը նպաստող ուժ: Վերջին շրջանում Կենտրոնն առաջնահերթ տեղ է հատկացնում տարածաշրջանային անվտանգության ու համագործակցության, քաղաքացիական կրթության, պետության եւ ազգի համար վճռորոշ՝ ներքին ու արտաքին քաղաքականությունների կիրառական հետազոտությանը: