«Հայկական Ժամանակ». Նժդեհի ազգականուհին արդեն 3-րդ օրն է հացադուլ է անում նախագահականի դիմաց

Գարեգին Նժդեհի ազգականուհի Էմմա Սահակյանը ՀՀ նախագահական նստավայրի մոտ երեկ արդեն 3-րդ օրն էր` հացադուլ էր անում, իսկ ձեռքին Նժդեհի մասին պատմող գիրքն էր: Մինչ հացադուլը, նա 82 օր ու գիշեր անժամկետ նստացույց է արել նույն նախագահական նստավայրի մոտ:

«ՀԺ»-ի թղթակցի հետ զրույցում 70-ն անց էմմա Սահակյանը պատմել է, որ նստացույցի ընթացքում ոստիկանության աշխատակիցներն անընդհատ փորձել են իրեն հեռացնել այդտեդից՝ հորդորելով բողոքի ակցիան շարունակել մեկ այլ տեղ: Տեսնելով, որ ոստիկանները շատ են խոչընդոտում, կինը որոշել է հացադուլ սկսել:

Նա պահանջում է, որպեսզի վերադարձնեն իրենից խլված ունեցվածքը: Էմմա Սահակյանի պնդմամբ, բացի այն, որ քրոջ աղջիկը խաբեությամբ ու տարբեր մեքենայությունների ճանապարհով տեր է դարձել մահացած քրոջ բնակարանին, որը նա ժառանգել էր իր՝ Էմմա Սահակյանի դստերը, այլ նաև իրեն զրկել է ունեցվածքից:

Մինչ քրոջ մահը՝ հացադուլ հայտարարած կինը նրա հետ ապրել է նույն բնակարանում: Նա համոզված է, որ զարմուհին՝ Սուսաննա Մարգարյանը, միտումնավոր է իրեն զրկել ունեցվածքից, որպեսզի ինքը նյութական միջոցներ չունենա փաստաբան վարձելու համար: Այս իրավիճակն ստեղծվել է 2009-ի ամռանը:

Դրանից հետո, երեք տարի շարունակ դատական գործընթացներ են եղել, և կինը հույս է ունեցել, որ խնդիրը կլուծվի: Քանի որ սայլը տեղից չի շարժվել, ավելի քան 82 օր աոաջ նա նստացույց է սկսել, ապա նաև՝ հացադուլ:

Էմմա Սահակյանի խոսքով, նախօրեին նախագահականի նամակների բաժնից իրեն առաջարկել են ծերանոցում տեղավորել, քանի որ անօթևան է, բայց ինքը հրաժարվել է: Նա իր ունեցվածքն է պահանջում: Հացադուլավոր կնոջ ինքնազգացողությունը երեկ վատացել էր:

Շտապ օգնության բժիշկները նրան ներերակային ներարկում են արել: