«ՀԺ». Վիկտորից «քաշվածը» և Սերժից «քշվածը»

Նախկին պատգամավոր Վիկտոր Դալլաքյանը երեկ վերջապես պաշտոն ստացավ. Աժ-ում Սերժ Սարգսյանի պաշտոնական ներկայացուցիչ' Գառնիկ Իսագուլյանի փոխարեն: «Հայկական ժամանակ»-ը գրում է, որ Դալլաքյանը, որ ժամանակին Ս. Սարգսյանին մեղադրում էր կազինոներում գումարներ տանուլ տալու համար և մի քանի անգամ մեծամասնական ընտրակարգով իր հայրենի Վանաձորից Աժ պատգամավոր էր դարձել թունդ ընդդիմադիր ելույթների շնորհիվ, Աժ վերջին ընտրություններում չընտրվեց: Նրան Վանաձորի թիվ 30 ԸՏ-ում առաջադրել էր ՀՀԿ-ն, նաև ՀՀԿ համամասնական ցուցակում էր ընդգրկված (178-րդն էր): Տևական ժամանակ նրա համար պաշտոն էին որոնում, ի վերջո' գտան: Ի դեպ, Գառնիկ Իսագուլյանը տեղյակ չէր, որ արդեն ազատված է աշխատանքից: Երեկ, երբ «ՀԺ»-ն զանգահարեց և հայտնեց այդ լուրը, անակնկալի եկավ:

- Պարոն Իսագուլյան, հիշո՞ւմ եք, որ մենք ասում էինք' ձեր փոխարեն Վիկտոր Դալլաքյանին են նշանակելու, ասում էիք' նման բան չկա: Հիմա ինչպե՞ս ստացվեց:

- Ի՞նչ է եղել:

- Դե, հիմա ինքն է ձեր փոխարեն լինելու Սերժ Սարգսյանի ներկայացուցիչը:

- Բայց որտե՞ղ է դա ձևակերպված:

- Արդեն նույնիսկ Ս. Սարգսյանի հրամանագիրը կա:

- Որտե՞ղ:

- Լրատվամիջոցներին նոր ուղարկեցին:

- Ես դեռ չեմ ստացել:

- Այսինքն, տեղյակ չե՞ք դեռ, որ ազատված եք:

- Չէ: Հենց պաշտոնապես ստանամ, այն ժամանակ էլ կասեմ:

- Իսկ ձեզ հետ ոչ ոք չի՞ խոսել այդ թեմայով:

- Նորից եմ ասում, պաշտոնական որևէ բան չունեմ: Հենց կլինի պաշտոնական հաղորդագրությունը, ես անպայման կասեմ:

- Մենք ստացել ենք:

- Ե՞րբ եք ստացել:

- Մի քանի րոպե առաջ:

- Ումի՞ց եք ստացել:

- ԶԼՄ-ներին հաղորդագրություն է ուղարկվել:

- Ի՞նչ են ուղարկել:

- Որ Սերժ Սարգսյանի հրամանագրով՝ Դալլաքյանը նշանակվում է ՀՀ նախագահի ներկայացուցիչը Աժ-ում:

- Հա՞, իսկ կա՞ նախագահի հրամանագիրը, որ Իսագուլյանը ազատվում է:

- Հիմա կարդա՞մ:

- Այո:

- Նախագահ Սերժ Սարգսյանն այսօր հրամանագրեր է ստորագրել Գառնիկ Իսագուլյանին ՀՀ Աժ-ում ՀՀ նախագահի մշտական ներկայացուցչի պաշտոնից ազատելու և Վիկտո Դալլաքյանին ՀՀ Աժ-ում ՀՀ նախագահի մշտական ներկայացուցիչ նշանակելու մասին:

- Շարունակությունը կարդացեք, խնդրում եմ:

- Շարունակությունն ուրիշ բան է' հանրապետության ղեկավարի մեկ այլ հրամանագրով գեներալ-լեյտենանտ Արշալույս Փայտյանն ազատվել է ՀՀ ԶՈԻ գլխավոր շտաբի պետի տեղակալի պաշտոնից: Վերջ:

- Եթե պաշտոնական հրամանագրերը ստացել եք, կարող եք արձանագրել:

- Բայց ինչո՞ւ այսպես եղավ, դուք ասում էիք, որ նման բան չի կարող լինել:

- Հիմա էլ եմ ասում, ես պաշտոնական որևէ բան դեռ չեմ ստացել:

- Ես պաշտոնականը ձեզ համար կարդացի:

- Չգիտեմ' հեռախոսով ինչ կարդացիք: Երբ պաշտոնականը կստանամ, ձեզ անպայման կասեմ: