Առաջարկ ՀՀ նախագահին

Ուղիղ մեկ շաբաթ առաջ Ադրբեջանի նախագահ Իլհամ Ալիևը ներում շնորհեց մարդասպան Ռամիլ Սաֆարովին, և այդ օրվանից ի վեր չեն դադարում քննարկումներն այն մասին, թե դա  ինչպիսի ազդեցություն կունենա ԼՂ բանակցային գործընթացի վրա եւ ինչ հնարավոր փոփոխություններ պետք է անի իր դիրքորոշման մեջ պաշտոնական Երևանը:

Օրինակ, նախկին ԱԳ նախարար Վարդան Օսկանյանը գտնում է, որ հիմա հարմար պահն է փոխել շեշտադրումները և կենտրոնանալ ԼՂՀ ինքնորոշված լինելու փաստը ամրագրելու վրա: Պարոն Օսկանյանը չի մանրամասնել' դա պետք է արվի՞ Հայաստանի կողմից ԼՂՀ ճանաչման միջոցով, ինչպես վերջին օրերին առաջարկում են շատերը, թե՞ այլ եղանակներով: Արտգործնախարար Էդվարդ Նալբանդյանն, իր հերթին, այս շաբաթ հայտնեց, որ Հայաստանը բանակցային գործընթացից դուրս գալու մտադրություն չունի և հիշեցրեց, որ հենց Ադրբեջանն է մերժում միջնորդ-երկրների բոլոր առաջարկները:

Իրականում ԼՂ բանակցային գործընթացը փաստացի սառեցված վիճակում է գտնվում ավելի քան մեկ տարի: Նրանից հետո, երբ նախորդ տարվա ամռանը Կազանում Ադրբեջանը ետ կանգնեց ձեռք բերված պայմանավորվածություններից, համանախագահները, ըստ էության, ակտիվ միջնորդություն չեն անում' ջանքերը կենտրոնացնելով գործընթացը քիչ թե շատ «կենդանի» վիճակում պահելու համար: Նույնիսկ մինչև Սաֆարովի ազատ արձակումը գործընթացում առաջընթաց արձանագրելու մեծ հույսեր չկային, իսկ այսօր դրանց առկայության մասին կարող են խոսել միայն անուղղելի լավատեսները:

ՀՀ նախագահ Սերժ Սարգսյանին երեկ անուղղակի կերպով կշտամբեց միջազգային հանրությանը, ասելով որ Սաֆարովի ներման պատճառներից մեկն այն է, որ տարիներ շարունակ միջազգային տարբեր կառույցներ «քաղաքական կոռեկտություն» են դրսևորում Ադրբեջանի նկատմամբ ու անընդհատ հավասարության նշան դնում կողմերի միջև:

Մեծ հույսեր չկան, որ միջազգային դերակատարները կխախտեն «քաղաքական կոռեկտությունը», ուստի ՀՀ նախագահին առաջարկում եմ դա անել ինքնուրույն: Ինչպե՞ս:

Հայաստանը պետք է ԵԱՀԿ Մինսկի խմբի համանախագահների միջոցով Սերժ Սարգսյանի և Իլհամ Ալիևի հանդիպում նախաձեռնի: Յուրաքանչյուր նման հանդիպման առաջին 1-2 րոպեները բաց են լրագրողների համար' արարողակարգային նկարահանման համար: Սովորաբար այդ ընթացքում նախագահները և միջնորդները քաղաքավարի ժպիտներով խոսում են ոչնչի մասին' «ինչպե՞ս եք», «այսօր լավ եղանակ է» և այլն:

Առաջարկում եմ ՀՀ նախագահին խախտել այդ ավանդույթը և հանդիպման հենց արարողակարգային նկարահանման պահին հարց ուղղել Իլհամ Ալիևին.

- Պարոն նախագահ, ինչպե՞ս եք քնում նրանից հետո, երբ ազատություն շնորհեցիք մարդասպանին, ով քնած մարդուն կացնով 16 հարված հասցրեց:

Եվ թող Իլհամ [Ռամիլ] Ալիևը պատասխանի այդ հարցին' տեսախցիկների առջև:

Արա Թադևոսյան

Mediamax.am