Բողոքի ցույց Իսպանիայում՝ Հունգարիայի դեսպանատան առջև (լուսանկարներ)

Երեկ Իսպանիայի մայրաքաղաք Մադրիդում՝ Հունգարիայի դեսպանության առջև, կայացել է բողոքի ցույց՝ ցմահ բանտարկության դատապարտված ադրբեջանցի մարդասպան Ռամիլ Սաֆարովին հունգարական իշխանությունների կողմից Ադրբեջանին հանձնելու, այնուհետ վերջինիս ազատ արձակելու կապակցությամբ:

Իսպանահայությունը ներկայացնող Մադրիդի Հայ երիտասարդների միության, Հայ Առաքելական եկեղեցու ծխական խորհրդի և Իսպանիայի Հայ ազգային խորհրդի առաջնորդությամբ ցուցարարները, շղթա կազմելով Հունգարիայի դեսպանության առջև, ցուցանակների և բարձրախոսի միջոցով իրենց վրդովմունքն ու բողոքն են արտահայտել հունգարա-ադրբեջանական ամոթալի գործարքի կապակցությամբ: Դեսպանության շրջակայքում հավաքված իսպանացի և այլազգի հասարակությանը բաժանվել են կատարվածը լուսաբանող թռուցիկներ:

Համայնքի ներկայացուցիչներին ցույցի վերջում ընդունել է Իսպանիայում Հունգարիայի դեսպանը, որին փոխանցվել է համայնքային կազմակերպությունների անունից կազմված բողոք-հռչակագիր: Այդ բողոք-հռչակագրի միջոցով Հունգարիայի իշխանություններից պահանջվել է ճանաչել իրենց կողմից գործած կոպիտ սխալը և համապատասխան քայլեր ձեռնարկել՝ վերականգնելու ժողովրդավարական և քաղաքակիրթ երկրի բարի համբավը:

Հունգարացի դիվանագետն իր երկրի կառավարության անունից ափսոսանք է հայտնել Ադրբեջանի ղեկավարության կողմից հանցագործին ազատ չարձակելու խոստումը դրժելու կապակցությամբ:

{gallery}ispania{/gallery}