Times. ԵՄ-ն կարող է արգելել Յանուկովիչի այցը Բրյուսել

 ԵՄ-ը կարող է արգելել Ուկրաինայի նախագահ Վիկտոր Յանուկովիչի այցը Բրյուսել նախկին վարչապետ, այժմ ընդդիմության առաջնորդ Յուլիա Տիմոշենկոյի նկատմամբ իրագործած դատավճռի հետ կապված։

Ըստ աղբյուրի հրապարակման՝ հնարավոր է, որ ԵՄ-ը կշարունակի «դիվանագիտական դեմարշ»–ը Ուկրաինայի նկատմամբ։ Յանուկովիչի այցելությունը Բրյուսել նախատեսված է հոկտեմբերի 20-ին: Այնտեղ նա հանդիպելու է Եվրոպական հանձնաժողովի նախագահ Խոսե Մանուել Բարոզոի և Եվրոպայի Խորհրդի ղեկավար Հերման Վան Ռումպեի հետ։ Այցի հիմնական նպատակն է քննարկել ԵՄ–ին քաղաքական ասոցացման և ազատ առևտրի համաձայնագրի մանրամասները, որ նախատեսվում է ստորագրել դեկտեմբերին: Հիշեցնենք, որ երեկ Կիևի դատարանը Տիմոշենկոյին դատապարտեց յոթ տարվա ազատազրկման՝ նրան մեղադրելով պաշտոնական դիրքի չարաշահման, 2009թ. Ռուսաստանի հետ գազի պայմանագրերի ապօրինի կնքման մեջ։

Դատարանը Տիմոշենկոյին պահանջեց փոխհատուցել «Нафтогаз» ընկերությանը պատճառած 189,5 մլն դոլար վնասը։

Դատավճռից հետո միջազգային հանրությունը սուր քննադատության ենթարկեց Ուկրաինայի իշխանություններին: ԵՄ–ը հայտարարել է, որ այս դատավճիռը վատ կանդրադառնա Ուկրաինայի հետ հարաբերությունների վրա։