Տարոն Մարգարյանը հանդիպել է ՀՀ-ում Գերմանիայի Դաշնային Հանրապետության դեսպանի հետ

Երևանի քաղաքապետ Տարոն Մարգարյանը հանդիպել է ՀՀ-ում Գերմանիայի Դաշնային Հանրապետության արտակարգ և լիազոր դեսպան Հանս-Յոխեն Շմիդտի հետ: Հանդիպմանը մասնակցել են նաև Գերմանական միջազգային համագործակցության ընկերության հայաստանյան գրասենյակի ու Վերականգնման վարկերի բանկի հայաստանյան ծրագրերի ղեկավարները:

Շնորհավորելով Տարոն Մարգարյանին Երևանի քաղաքապետ ընտրվելու կապակցությամբ՝ դեսպան Հանս-Յոխեն Շմիդտը կարևորել է գերմանական քաղաքների և Երևանի միջև տեղական ինքնակառավարման համակարգում գործընկերային հարաբերությունների ընդլայնման ու զարգացման հեռանկարները։

«Հաշվի առնելով Ձեր փորձն ու հաջողությունները քաղաքային տնտեսության կառավարման ոլորտում՝ վստահ եմ, որ այն հաջողությամբ կկիրառեք նոր քաղաքապետի պաշտոնում»,- նշել է դեսպանը:

Շնորհակալություն հայտնելով շնորհավորանքների և բարեմաղթանքների համար՝ քաղաքապետը բարձր է գնահատել հայ-գերմանական հարաբերությունների ներկա մակարդակը՝ նշելով, որ Երևանի քաղաքապետարանը շահագրգռված է քաղաքային գործընկերային ձևաչափով համագործակցության ակտիվացման և գերմանական քաղաքների հետ երկկողմ հարաբերությունների զարգացման գործում:

«Մենք պատրաստ ենք ակտիվացնել համագործակցությունը'սերտ մասնակցություն ակնկալելով քաղաքային տնտեսության կառավարման բոլոր ուղղություններով փորձի փոխանակման, մասնագետների վերապատրաստման, խորհրդատվական ծառայությունների մատուցման, ինչպես նաև համատեղ և փոխադարձ հետաքրքրություն ներկայացնող բիզնես ծրագրերում»,- նշել է Տարոն Մարգարյանը:

Որպես Եվրոպայի խորհրդի տեղական և տարածաշրջանային իշխանությունների կոնգրեսի պատգամավոր՝ քաղաքապետը փաստել է, որ գերմանացի գործընկերների հետ ձևավորված հարաբերությունները պետք է դառնան ավելի գործնական և ամրապնդվեն համատեղ իրականացվող ծրագրերով:

Դեսպան Հանս-Յոխեն Շմիդտն իր հերթին նշել է, որ Հայաստանում ներկայացված գերմանական կազմակերպությունները մեծ փորձ ունեն քաղաքային տնտեսության ենթակառուցվածքների համակարգման ոլորտում և պատրաստակամություն է հայտնել իր առաքելության շրջանակում նպաստել փոխադարձ կապերի ամրապնդմանն ու գերմանական կողմի մասնակցությանն այդ ծրագրերում:

Տարոն Մարգարյանը նշել է, որ բոլոր այն ծրագրերը, որոնք Երևանի քաղաքապետարանը ձեռնարկել է Վերականգնման վարկերի բանկի հետ, կունենան իրենց շարունակությունը և հույս է հայտնել, որ կգտնեն նաև համագործակցության այլ եզրեր: