«Ժողովուրդ». Հակադարձումներ՝ Շարմազանովի հայտարարությանը

ՀՀԿ խոսնակ Էդուարդ Շարմազանովը հավանաբար լավ է յուրացրել Գեբելսի հայտնի խոսքը. «Որքան մեծ լինի սուտը, այնքան շատ կհավատան դրան»: Եվ ահա այդ տրամաբանության շրջանակներում էլ Աժ փոխխոսնակը հայտարարել է. «Տնտեսությունը լավն է, թե ոչ դրա կարևորագույն գնահատականը տվել է ՀՀ քաղաքացին մայիսի 6-ի ընտրություններին, այդ ընտրություններին ՀՀ քաղաքացիների մեծամասնությունը վստահել է ՀՀԿ քաղաքականությանը թե օրենսդիրում, թե գործադիրում»:

Թե ինչքան գումարով Աժ ընտրություններին գնվեց ՀՀ քաղաքացին, բոլորիս է հայտնի: ՀՀ տնտեսության վիճակի գնահատականը տվել է նաև ԱՎԾ-ն` իր վիճակագրական տվյալներով. ըստ այդմ` ՀՀ-ում 2007թ. աղքատությունը կազմել է 17 տոկոս, 2012թ. հասել է 36 տոկոսի: 2012թ. աոաջին 6 ամսում երկրից արտագաղթել 199 հազար 255 մարդ, ինչը 10 հազարով ավելի է նախորդ տարվա նույն ժամանակահատվածի տվյալներից: ՀՀ-ում նվազել է ծնունդների թիվը. 2012թ. առաջին կիսամյակում ծնվել է 19 հազար 183, նախորդ տարվա նույն ժամանակահատվածում` 19 հազար 995 հոգի: 2011թ. բնական հավելաճը եղել է 5 հազար 319, իսկ այս տարի՝ 4 հազար 306:

Նման ցուցանիշներ կարելի է երկար շարունակել: Սերժ Սարգսյանի իշխանության օրոք հրապարակված այս թվերը թերևս լավագույնն են հակադարձում ՀՀԿ-ական Շարմազանովին: