Ռուբեն Հայրապետյանը թող տե՛ղ և ժա՛մ ասի. Դավիթ Սանասարյան

ՀՀԿ ԱԺ պատգամավոր Ռուբեն Հայրապետյանը հարցազրույց է տվել «Նուվել դ’Արմենի Մագազին» ֆրանսիական ամսագրին, որում սպառնացել է «Պահանջում ենք պատժել Հարսնաքարում տեղի ունեցածի բոլոր մեղավորներին» նախաձեռնության ակտիվիստներին։

Այս առթիվ Լուրեր.com–ը զրուցել է «Պահանջում ենք պատժել «Հարսնաքարում» տեղի ունեցածի բոլոր մեղավորներին» քաղաքացիական նախաձեռնության անդամ Դավիթ Սանասարյանի հետ։ Ստորև բերում ենք նրա կարծիքը Հայրապետյանի զրույցի մասին.

«Ռուբեն Հայրապետյանը, եթե փոքր-ինչ լայնախոհ լիներ, կհետաքրքրվեր թե ո՛վ եմ ես, ի՛նչ կեցվածք ու հետագիծ ունեմ, ու իմ հետ սպառնալիքի լեզվով չէր խոսի: Այժմ ես կարեկցանքով եմ վերաբերվում նրան, քանի որ նման հոգեվիճակ ունեցող մարդիկ չեն տիրապետում իրենց մտքերին, զգացմունքներին։

 Հայրապետյանը հարցազրույցի ողջ ընթացքում մեղադրանք է ներկայացնում իր տան մոտ գնալու համար։ Դա Հարսնաքարի մոտ հավաքված ՀՀ քաղաքացիների պահանջն է եղել՝ գնալ և բողոքն արտահայտել նրա դեմ, ոչ թե՝ նրա տան անդամների։ Բացի այդ՝ նա ավելի շատ խոսում է Տարոն Մարգարյանի տան մոտով անցնելու մասին, քան՝ իր։ Նա ավելի շատ խոսում է իր բիզնեսի դեմ տարվող բոյկոտի մասին, քան՝ իր տան մոտ գնալու: Փաստորեն, նրան ավելի շատ անհանգստացնում է Տարոն Մարգարյանի տան մոտ գնալն ու իր բիզնեսի վտանգման փաստը, քան այն, որ ողջ Հայաստանով և Սփյուռքով մեկ խայտառակ է եղել»։

Դ. Սանասարյանը նշեց նաև, որ Տարոն Մարգարյանը երկրի պետական պաշտոնյանրից մեկն է, Հայրապետյանի կուսակիցը, Ավանի նախկին թաղապետը, և բնականաբար նրա տան մոտով անցնելիս չէր բացառվում, որ  խաղաղ ցույցի մասնակիցներից ոմանք, հնարավոր է, որոշակի վանկարկումներ անեին. դա նորմալ է։ Նորմալ չէ այն, որ Ռուբեն Հայրապետյանը հարցազրույցների տեսքով սպառնալիքներ է հնչեցնում:

«Իսկ ինչ վերաբերում է այն բանին, որ մենք նրա երեխաների վրա ենք գնացել, նրա կինը դրանից լաց է եղել, մի բան ուղղակի հստակ ասեմ՝ իր ողջ հարցազրույցի ժամանակ Հայրապետյանը չի խոսել Վահե Ավետյանի կնոջ մասին, ով դարձավ սգավոր, նրա երեխաների մասին, ովքեր որբացան, նրա ծնողների մասին, ովքեր դարձան որդեկորույս: Ընդհակառակը՝ նա համառորեն պնդում է, որ ինքը Վահեի հարազատներին հանդիպելու պատճառ չունի, թող ովքեր սպանել են, նրա հարազատներն էլ գնան: Ինձ թվում է՝ նրա տան անդամները ավելի շատ կանհանգստանան այն ժամանակ, երբ ինքը պատասխան տա քաղաքացիական իրական արդարադատության առջև: Նորից կրկնեմ, որ բողոքի ցույցի անդամները որևիցե միտում չեն ունեցել սպառնալ նրա տան անդամներից որևէ մեկին։ Մեր բողոքն ուղղված է եղել դատապարտելի երևույթի դեմ, որը առկա է մեր երկրում և որի զոհը կարող էր դառնալ նաև Հայրապետյանի տան անդամներից մեկը»,- ասաց Դավիթ Սանասարյանը և հավելեց, որ եթե Հայրապետյանի համար սպառնալիքի հիմք է հանդիսացել իր տան մոտ գնալը, ապա նա գոնե առաջին երթից հետո պետք է հայտարարեր՝ ես այսինչ վայրում կամ հասցեում եմ լինելու, եթե բան ունեք ասելու, եկեք այսինչ տեղը:

Հիմա հուշում եմ՝ այսքան երկար հարցազրույց տալու, կյանքը պատմելու ու սպառնալու փոխարեն թող տեղ և ժամ ասի.  ես շատ ասելիք ունեմ, կարծում եմ՝ ինքն էլ։

Գայանե Համբարձումյան