Հանձնվեցին ՏՏ ոլորտում ՀՀ նախագահի ամենամյա կրթական մրցանակներ

Տեղեկատվական տեխնոլոգիաների ոլորտում Հայաստանում լավագույնը ճանաչված 38 ուսանողների ու աշակերտների ՀՀ նախագահ Սերժ Սարգսյանը հոկտեմբերի 12-ին հանձնեց ՀՀ նախագահի ամենամյա մրցանակներ՝ «Սինոփսիս»-ի շաբաթվա շրջանակում: ՏՏ ոլորտում ամենամյա կրթական պարգեւներ շնորհվում են սկսած 2005թ.ից՝ «Սինոփսիս»-ի /Կիսահաղորդիչների նախագծման եւ արտադրության համար ծրագրային միջոցների եւ մտավոր սեփականության ոլորտի համաշխարհային առաջատար/ ու «Հայաստան» համահայկական հիմնադրամի միջեւ կնքված համաձայնության հիման վրա:

2011թ. մրցանակներին արժանացել են 23 ուսանողներ Հայաստանի Պետական Ճարտարագիտական համալսարանից, Երեւանի Պետական համալսարանից, Հայաստանի Ամերիկյան համալսարանից, Ռուս-հայկական /Սլավոնական/ Պետական համալսարանից եւ Եվրոպական Ակադեմիայից: Մրցանակների են արժանացել նաեւ 15 աշակերտներ Երեւանի, Վանաձորի եւ Գյումրիի ֆիզիկա-մաթեմատիկական ուղղվածություն ունեցող 7 դպրոցներից:

Մասնավորապես, «Լավագույն բակալավր» անվանակարգի առաջին եւ երկրորդ կարգերի մրցանակներ ստացան 8 ուսանողներ Հայաստանի Պետական Ճարտարագիտական համալսարանից, Երեւանի Պետական համալսարանից, Ռուս-հայկական /Սլավոնական/ Պետական համալսարանից եւ Եվրոպական Ակադեմիայից /առաջին կարգի մրցանակը կազմում է 500, իսկ երկրորդ կարգինը՝ 400 ԱՄՆ դոլար/:

«Լավագույն մագիստրանտ» անվանակարգում առաջին եւ երկրորդ կարգի մրցանակներ շնորհվեցին 7 ուսանողների /մրցանակների գումարը համապատասխանաբար կազմում է 750 եւ 500 ԱՄՆ դոլար/:

«Լավագույն ասպիրանտ» անվանակարգում առաջին եւ երկրորդ կարգի մրցանակներ՝ համապատասխանաբար 1000 եւ 750 ԱՄՆ դոլար, ստացան 5 ասպիրանտներ:

«Լավագույն ուսանողուհի» անվանակարգում 500 ԱՄՆ դոլար մրցանակ ստացավ ՀՊՃՀ ուանողուհի Մարի Հովհաննիսյանը, իսկ «Լավագույն սփյուռքահայ ուսանող» անվանակարգում առաջին կարգի՝ 750 ԱՄՆ դոլար, մրցանակ է ստացել Նանար Շահվերդյանը եւ 500 դոլար կազմող երկրորդ կարգի մրցանակ՝ Ադեհ Միրզախանյանը:

«Լավագույն աշակերտ» անվանակարգերում 100-ական դոլար մրցանակներ ստացան երկուական աշակերտներ «Քվանտ» վարժարանից, Ա.Շահինյանի անվան ֆիզիկա-մաթեմատիկական մասնագիտացած կրթահամալիրից, ՀՊՃՀ հենակետային վարժարանից, Գյումրու «Ֆոտոն», Վանաձորի «Էվրիկա» քոլեջներից եւ «Մխիթար Սեբաստացի» կրթահամալիրից, երեք աշակերտներ «Անանիա Շիրակացի» ճեմարանից: Ընդհանուր առմամբ, մրցանակային գումարը կազմել է 15600 ԱՄՆ դոլար կամ 5 694 000 ՀՀ դրամ:

«Սինոփսիս Արմենիա» ընկերության գործադիր տնօրեն Հովիկ Մուսայելյանը նշեց, որ 2011թ. որեւէ մեկի գրանպրի չի շնորհվել ոչ այն պատճառով, որ թեկնածուներ չկային, այլ այն պատճառով, որ թեկնածուների շարքում չկար բացահայտ լիդեր:

Հայաստանի նախագահ Սերժ Սարգսյանը շնորհավորեց մրցանակակիրներին: «Ես վստահ եմ, որ ապագայում այս մրցանակաբաշխությունը լինելու է շարունակական, որովհետեւ այս բնագավառը մեր երկրի զարգացման հեռանկարային ուղղություններից է»,- ասաց երկրի ղեկավարը: