Ալիևը ղարաբաղյան հակամարտությունն անվանել է պատմություն
ԱրցախԱդրբեջանի նախագահ Իլհամ Ալիևը հայտարարեց, որ ղարաբաղյան հակամարտության մասին արդեն անցյալ ժամանակով պետք է խոսել՝ նշելով, որ Ղարաբաղում պահպանվում է հրադադարի ռեժիմը, և «այդ ռեժիմն օր օրի կամրանա»:
«Ես լիովին համաձայն եմ Վլադիմիր Վլադիմիրովիչի հետ այն փաստի առթիվ, որ ղարաբաղյան հակամարտության մասին մենք պետք է արդեն խոսենք անցյալ ժամանակով: Սա արդեն պատմություն է», - ասաց Ալիևը ԱՊՀ պետությունների ղեկավարների խորհրդի նիստում:
Անդրադառնալով Լեռնային Ղարաբաղում Ռուսաստանի խաղաղապահ առաքելությանը՝ Ալիևը նշեց, որ այն «շատ հաջող է իրականացվում»: «Խաղաղապահ առաքելությունը մշտական կապի մեջ է Ադրբեջանի Հանրապետության համապատասխան կառույցների հետ: Հայտարարության ստորագրումից գրեթե մեկուկես ամիս անց Ղարաբաղում եղել է հրադադարի ռեժիմի խախտման միայն մեկ միջադեպ։ Բառացիորեն մեկ օրվա ընթացքում միջադեպը կարգավորվեց, հրադադարը շարունակվում է, և ես կարծում եմ, որ ամեն օր այն ավելի ու ավելի ուժեղ կլինի», - ասաց Ալիևը: