Ղարաբաղյան խնդիրը՝ Քլինթոնի ու Լավրովի քննարկման առարկա

Վլադիվոստոկում տեղի ունեցած Ասիա-խաղաղօվկիանոսյան տնտեսական համագործակցության (Asia-Pacific Economic Cooperation (APEC)) գագաթնաժողովի շրջանակներում հանդիպել են Ռուսաստանի Դաշնության և Միացյալ Նահանգների արտաքին գերատեսչությունների ղեկավարները:

Ինչպես փոխանցում է Ռուսատանի ԱԳՆ պաշտոնական կայքը, ՌԴ արտգործնախարար Սերգեյ Լավրովն ու ԱՄՆ պետքարտուղար Հիլարի Քլինթոնը մի շարք հարցերի հետ քննարկել են նաև Լեռնային Ղարաբաղի հակամարտության կարգավորման հարցը:

«Մենք նաև ցանկություն հայտնեցինք շարունակել ջանքերը՝ որպես ԵԱՀԿ Մինսկի խմբի համանախագահներ՝ Լեռնային Ղարաբաղի հակամարտության կարգավորման հետ կապված բանակցությունների վերսկսման համար»,– նշված է ՌԴ ԱԳՆ պաշտոնական հայտարարության մեջ:

Քլինթոնն ու Լավրովը հանդիպման ընթացքում քննարկել են նաև Սիրիայի շուրջ ստեղծված իրավիճակը, խոսել Իրանի միջուկային ծրագրերից ու Կորեական թերակղզուն առնչվող հարցերից, ինչպես նաև մերձդնեստրյան հակամարտության կարգավորման շուրջ ընթացող բանակցությունների «5+2» ձևաչափից:

Համաձայն ՌԴ ԱԳՆ-ի տեղեկությունների՝ տեղի է ունեցել կարծիքների փոխանակում երեխաների որդեգրման ոլորտում փոխգործակցության, վիզային ռեժիմի թեթևացման հարցերի վերաբերյալ:

Կնքվել են մի շարք կարևոր պայմանագրեր Ռուսաստանի և ԱՄՆ-ի միջև, այդ թվում՝ Անտարկտիդայում համագործակցության մասին հուշագիրը: