Դադարներ են պետք, որպեսզի նորովի ընկալվես. Արփինե Իսրայելյան (ֆոտոշարք)

Արփինե Իսրաելյանը, ով հանրությանը ծանոթ է հատկապես «Աննա» հեռուստասերալից, վերջերս հեռուստաէկրաններում հազվադեպ է երևում: Թե ինչ «իրարանցման» մեջ է դերասանուհին, փորձեցինք պարզել հենց իրենից: 

Անցյալ տարի այս ժամանակ նշանադրվեցիք, Արփինե՛, և կարծես թե հարսանիքն էլ այս տարի էր ծրագրվում. հարսանեկան նախապատրաստական աշխատանքնե՞րն են պատճառը, որ հեռուստասերիալներում չեք երևում:

- (Ժպտում է )Հիշում եմ... Անկեղծ ասած՝ չեմ ուզում անձնականիս մասին խոսել, գուցե նաև դա… բայց սերիալներում բացակայությունս հիմնականում պայմանավորված է իմ խիտ գրաֆիկով: Բացի այդ` կարծում եմ՝ հեռուստասերիալներում դադարներ պետք է լինեն, որպեսզի հեռուստադիտողը հասցնի քեզ կարոտել, և նոր դերդ հետաքրքրություն առաջացնի, քեզ նորովի ընկալեն:

Այժմ թատրոնը նորից առաջնային դերում է, թեև, ըստ իս, յուրաքանչյուր դերասանի համար թատրոնը միշտ էլ առաջնային է: Երկու ներկայացումների մեջ եմ խաղում՝ «Երկուսը ճոճանակին» և «8 սիրագորով կանայք», վարում եմ Հանրային հեռուստաընկերությամբ «Առավոտ լուսո» ծրագիրը: Հետաքրքիր է նոր ոլորտում ինձ դրսևորելը:

-«Աննա» սերիալը բուռն քննարկումների առիթ էր դարձել, դրականի կողքին կային նաև բացասական կարծիքներ և քննադատություններ, դրանք որևէ հետևանք թողեցի՞ն։ Գուցե հիասթափությո՞ւն առաջացրեցին սերիալների նկատմամբ։

- Սերիալն, իհարկե՛, ավելի բուռն արձագանքի է արժանանում: Ինչու չէ, հետաքրքիր է լսել կարծիքներ քո՝ օրեցօր հասունացող կերպարի շուրջ, որոնց մեջ կան նաև բացասական կարծիքներ, սակայն դրանք չէին կարող ինձ ստիպել ընկճվել կամ հիասթափվել հեռուստաէկրանից: Ես փորձում եմ վատի մեջ լավը փնտրել: Դա ինձ համար ուղղակի աշխատանք էր, պրակտիկա:

-Հասցրե՞լ եք կարոտել սերիալային եռուզեռը:

-Անկեղծ ասած՝ չեմ կարոտում: Երևի զբաղվածությունս թույլ չի տալիս, որ հասցնեմ կարոտել:

-Իսկ գեղարվեստական ֆիլմերում նկարահանվելու առաջարկներ չե՞ն եղել։

-Այո՛, առաջարկ եղել է, սակայն ստիպված էի մերժել, այդ ընթացքում դեռ սերիալում էի նկարահանվում, նաև ուսանող էի և չէի կարող համատեղել ֆիլմի հետ:

-Իսկ չե՞ք ափոսում նման հնարավորությունը կորցնելու համար։ Չէ՞ որ ֆիլմն ավելի մնայուն է՝ ի տարբերություն սերիալի:

-Չէ՛, բնավ չեմ ափսոսացել: Ըստ իս՝ այդ շրջանում ուսում ստանալn ավելի կարևոր էր, այն ինձ օգնելու էր հետագայում ավելի պրոֆեսիոնալ հանդես գալ հենց այդպիսի ֆիլմերում:

-Վերադառնամ առաջին հարցիս. գուցե ասե՞ք՝ արդյոք կարգավիճակի փոփոխություն սպասվո՞ւմ է այս աշնանը։

-Դե՛…(ժպտում է..), բնականաբար փոփոխություններ կլինեն, լավ լուրեր սպասվում են... շատ հնարավոր է՝ մինչև աշնան վերջ:

 Ռ. Հակոբյան
{gallery}anna{/gallery}