88 մլն դրամ՝ Ամասիայի առողջության կենտրոնի շինարարության համար

Հայաստան 8 Դեկտեմբեր, 2011 8:13

Հայաստանի Հանրապետության վարչապետ Տիգրան Սարգսյանը երեկ Շիրակի մարզ կատարած աշխատանքային այցի շրջանակներում մասնակցել է Ամասիայի առողջության կենտրոնի բացման արարողությանը: Լրագրողների հետ զրույցում ՀՀ առողջապահության նախարար Հարություն Քուշկյանը կարևորել է Ամասիայի առողջության կենտրոնի վերանորոգումը, քանի որ այն սպասարկում է շուրջ 9 հազար բնակչի: Իսկ ձմռան ամիսներին, երբ տարածաշրջանի ճանապարհները դժվարանցանելի են, այն կարող է օգնել լուծելու առաջին բժշկական օգնության հարցերը:

Նախարարը նշել է, որ կենտրոնն ապահովված է ժամանակակից սարքավորումներով, համալրված է մասնագետներով: Հարություն Քուշկյանի խոսքով, անհրաժեշտության դեպքում համապատասխան մասնագետներ կգործուղղվեն մարզ:

«Ամասիայի առողջական կենտրոնը Շիրակի մարզում վերջինը չէ. հատուկ ուշադրություն է դարձվում բարձրլեռնային և լեռնային, ինչպես նաև սահմանամերձ համայնքներին»,- ասել է առողջապահության նախարարը՝ հայտնելով, որ մինչև ապրիլ նոր բժշկական կենտրոն կբացվի նաև Գյումրիում, ինչպես նաև մոտակա ժամանակներում` Մարալիկում:

Նշենք, որ կենտրոնի շինարարական աշխատանքներն իրականացվել են «Հայաստանի սոցիալական ներդրումներ» հիմնադրամի ֆինանսավորմամբ, որի արժեքը կազմել է մոտ 88 մլն դրամ: Ամասիայի առողջության կենտրոնը սպասարկում է նախկին շրջկենտրոնի և հարակից բնակավայրերի շուրջ 9000 բնակչի, առողջության կենտրոնն ունի ծննդատուն, պոլիկլինիկա և շտապ օգնության ծառայություն, որի լիարժեք գործունեության համար օժանդակ շինություն է կառուցվել:

Առողջության կենտրոնն ունի շտապօգնության երկու մեքենա, ինչպես նաև ծննդօգնության համար սարքավորումներ, որոնք երկրաշարժից հետո` 23 տարի չի ունեցել: Կենտրոնն ունի 30 աշխատող:

Ամասիայի առողջության կենտրոնից ՀՀ առողջապահության նախարար Հարություն Քուշկյանը մեկնել է Գյումրիում կառուցվող հիվանդանոցի շինհրապարակ, հանդիպել շինարարների հետ, ուսումնասիրել շենքի հարակից տարածքը, շրջել կիսակառույց շենքի հարկաբաժիններում, քննարկել տանիքի հետ կապված մի շարք հարցեր:

Նախարարը շինարարների հետ մեկ անգամ ևս քննարկել է շինարարական աշխատանքների ավարտի ժամկետները:

Հարություն Քուշկյանն այցելել է նաև Գյումրիի ավստրիական մանկական հիվանդանոց: Նախարարը շրջել է հիվանդանոցի մանկական բաժանմունքներում, դիտարկել առաջիկայում նախատեսվող վերանորոգման հնարավոր տարբերակները: