Փոխվարչապետն ընդունեց Միգրացիայի միջազգային կազմակերպության տարածաշրջանային տնօրենին

Հայաստանի Հանրապետության փոխվարչապետ, տարածքային կառավարման նախարար Արմեն Գեւորգյանն այսօր ընդունեց Միգրացիայի միջազգային կազմակերպության տարածաշրջանային տնօրեն Ռենատե Հելդին: Կողմերը քննարկեցին միգրացիոն ոլորտում համագործակցության հարցեր:

Փոխվարչապետը նշեց, որ միգրացիոն հիմնախնդիրները մշտապես գտնվում են ՀՀ կառավարության ուշադրության կենտրոնում, եւ այս համատեքստում բարձր է գնահատվում ՄՄԿ-ի հետ ձեւավորված արդյունավետ փոխգործակցությունը: Նա հատկապես կարեւորեց ՄՄԿ-ի ներդրումը ՀՀ կառավարության կողմից միգրացիայի կառավարման ոլորտում իրականացվող բարեփոխումների գործում, մասնավորապես՝ կենսաչափական կողմնորոշիչներ պարունակող էլեկտրոնային անձնագրերի եւ անձը հաստատող բիոմետրիկ քարտերի համակարգի ներդրման հարցերում: Փոխվարչապետը նաեւ ընդգծեց, որ Հայաստանն ակտիվորեն մասնակցում է միգրացիոն հիմնախնդիրների շուրջ ներկայումս ընթացող բոլոր միջազգային նախաձեռնություններին:

Զրուցակիցները միաժամանակ անդրադարձան աշխատանքներն առավել համագործակցված կազմակերպելու խնդրին: Փոխվարչապետը նշեց, որ 2010 թ. ՀՀ կառավարությունն ընդունել է «Հայաստանի Հանրապետության միգրացիայի պետական կարգավորման քաղաքականության հայեցակարգը», իսկ մեկ ամիս առաջ՝ «ՀՀ միգրացիայի պետական կարգավորման քաղաքականության հայեցակարգի իրականացման 2012-2016թթ գործողությունների ծրագիրը»: 2012թ. սկսվելու է ծրագրով նախատեսված գործողությունների իրականացումը, եւ Ա. Գեւորգյանը հույս հայտնեց, որ ՄՄԿ-ն ակտիվորեն կաջակցի ՀՀ կառավարությանն այդ գործում:

Իր հերթին Ռենատե Հելդը հավաստիացրեց, որ ՄՄԿ-ն առավելագույն աջակցություն կցուցաբերի այս կարեւորագույն ծրագրի իրականացման գործում: Բացի այդ, ՄՄԿ-ն պատրաստ է ներդրում ունենալ նաեւ «Շարժունակության շուրջ գործընկերություն» հռչակագրից բխող կոնկրետ ծրագրերի մշակմանն ու իրականացմանը: Նա նաեւ տեղեկացրեց, որ Հայաստանում է «Շարժունակության շուրջ գործընկերություն» վերջերս ստորագրված ՀՀ-ԵՄ քաղաքական հռչակագրի շուրջ դեկտեմբերի 7-ին ՄՄԿ-ի եւ ՀՀ կառավարության կողմից Երեւանում կազմակերպված համաժողովին մասնակցելու, ինչպես նաեւ ՄՄԿ գրասենյակի Հայաստանում ծավալած գործունեությանը տեղում ծանոթանալու նպատակով: