Ճապոնիան պաշտոնապես հայտարարեց Չինաստանի հետ վիճելի կղզիների ձեռքբերման մասին

Ճապոնիայի կառավարությունը ընդունեց պաշտոնական որոշում՝ Չինաստանի հետ վիճելի 5 Սենկակու (չինական անվանում՝ Դյաոյույդաո) կղզիախմբի երեք կղզիների` սեփականատեր Կուրիխարա ընտանիքից ձեռքբերման մասին, РИА Новости-ի հաղորդմամբ այդ մասին է տեղեկացնում կառավարության քարտուղար Օսամու Ֆուձիմուրան։

Ինչպես հայտնում են ճապոնական ԶԼՄ-ները, կղզիախմբի երեք ՝ Ուոցուրիձիմա, Կիտակոձիմա և Մինամիկոձիմա կղզիների ձեռքբերման մասին գործարքը կկնքվի արդեն երեքշաբթի օրը, որի գումարը կկազմի 2.05 մլրդ յեն (26.28 մլն դոլար)։

Սենկակու հինգ կղզիները համարվում են վիճելի տարածք Ճապոնիայի և Չինաստանի միջև։ Պեկինն ու Տոկիոն չեն կարողանում որոշել կղզիների շրջանում տնտեսական զոնաների միջև սահմանի անցկացումը։ Ճապոնիան պնդում է սահմանազատող գծի անցկացումը ջրային տարածքի մեջտեղով, իսկ Չինաստանը պնդում է այդ գիծը տեղափոխել դեպի ճապոնական ծովափ։ Ներկա դրությամբ Ճապոնիան վարձակալում է կղզիախմբի չորս կղզիները սեփականատիրոջից։ Վարձակալությունը պետության համար տարեկան կազմում է 24 մլն յեն (մոտ 314 հազար դոլար)։

Ճապոնիան պնդում է, որ զբաղեցնում է կղզիները 1895թ.-ից։ Պեկինն իր հերթին հիշեցնում է, որ ճապոնական քարտեզների վրա 1783թ. և 1785թ. Դյաոյույդաոն նշված է որպես չինական տարածք։

Երկրորդ Համաշխարհային պատերազմից հետո կղզիները գտնվել են ԱՄՆ-ի վերահսկողության տակ և փոխանցվել են Ճապոնիային 1972թ.-ին։ Թայվանում և մայրցամաքային Չինաստանում համարում են, որ Ճապոնիան պահում է կղզիները անօրինական կերպով։ Ճապոնիան համարում է, որ Չինաստանը և Թայվանը սկսել են հայտ ներկայացնել կղզիների նկատմամբ 1970-ական թվականներից, երբ հայտնի դարձավ, որ այս շրջանը հարուստ է օգտակար հանածոներով։