«ԱՄՆ-ն կարող է միջոցներ տրամադրել Հայաստանին՝ ներգաղթ կազմակերպելու համար». Ռուբեն Սաֆրաստյան

Այսօր լրագրողների հետ էր հանդիպել ԳԱԱ արևելագիտության ինստիտուտի տնօրեն Ռուբեն Սաֆրաստյանը՝ խոսելու Մերձավոր Արևելքի երկրների ներքաղաքական զարգացումների և այդ երկրներում հայ համայնքների վիճակի մասին։

Նա ասաց, որ տարածաշրջանում ակտիվացել են նախկինում կիսագաղտնի իրենց գոյությունը պահպանող ծայրահեղ իսլամիստական ուժերը. խռովությունների և ապստամբությունների հիմնական կազմակերպիչներն ու կողմնակիցներն այդպիսի հայացքներ ունեցող մարդիկ են։ Այդ հանգամանքն ու արաբական երկրներում տեղի ունեցող գործընթացներն ընդհանրապես, երբ համատարած իշխող ազգայնական ուժերին փոխարինում են իսլամամետ քաղաքական ուժերը, գրեթե անխուսափելի են դարձնում Մերձավոր Արևելքի քրիստոնյաների արտագաղթը։

Ամենամեծ խնդիրներն այսօր ծառացած են Սիրիայի հայ համայնքի առջև, որը կայացած, ինտեգրված համայնք է, և Ասադների իշխանության շրջանում ձեռք է բերել ապահով և բարեկեցիկ ապրելու հնարավորություն։ Եթե Ասադի իշխանությունը տապալվի, հայ համայնքը փաստացի վտանգված կլինի։ Ոչ պակաս վտանգավոր է նաև Սիրիայում Թուրքիայի դիրքերի հավանական ուժեղացումը, ինչն անխուսափելի կդառնա, եթե ընդդիմադիրները հաղթեն։

«Ամեն դեպքում պետք է պատրաստ լինել, որ Մերձավոր Արևելքի հայ համայնքները կլքեն այդ երկրները։ Իսկ ցանկացած երկիր ներգաղթելու համար պետք է այնտեղ բավարար պայմաններ լինեն։ Մենք այդ պայմանները չունենք, բայց չպետք է ձեռքներս ծալած նստենք»,- ասաց Սաֆրաստյանը։

Նա ասաց, որ ԱՄՆ-ը միջոցներ է տրամադրում իր ներգաղթողներին, որպեսզի նրանք ընդգրկվեն հասարակության մեջ։ Արևելագետի կարծիքով՝ կարելի է փորձել օգտագործել այդ տարբերակը։ «Ամերիկան կարող է այդ միջոցներից տրամադրել Հայաստանին, որպեսզի վերջինս ընդունի ներգաղթողների, ոչ թե այդ բոլոր մարդիկ գնան ԱՄՆ»,- ասաց բանախոսը։