Թուրք դեսպանուհու «հակաթուրքական» հայտարարությունը

Եվրոպայի հայկական միությունների ֆորումի և Սլովակիայի հայկական համայնքի նախագահ պ.Աշոտ Գրիգորյանն ամիսներ առաջ դիմել էր Սլովակիայի գլխավոր դատախազություն՝ Սլովակիայում Թուրքիայի արտակարգ և լիազոր դեսպանուհի Գյուլհան Ուլուտեկինի կողմից Սլովակիայի Քրեական օրենսգրքի՝ Հայոց ցեղասպանության ժխտումը քրեական հանցագործություն համարող 424ա հոդվածի խախտման համա, որի դեպքում նախատեսվում է ազատազրկում մինչև հինգ տարի ժամանակով:

Խոսքն այս տարվա ապրիլին Հայոց ցեղասպանության հուշաքար-խաչքարի մոտ տեղի ունեցած միջոցառման դեմ դեսպանուհու արձագանքի մասին էր՝ «Հայերը, Միկլոշկոն և Հարաբինը» վերնագրով, հրապարակված «Տիժդեն» շաբաթաթերթի մայիսի 4-ի համարում, որտեղ դեսպանուհին կասկած էր հայտնել Հայոց ցեղասպանության փաստի վերաբերյալ, միաժամանակ նշելով, որ «այդ ժամանակաշրջանում առավել շատ թուրքեր են կոտորվել»: Դատախազության հանձնարարությամբ Սլովակիայի ՆԳ ոստիկանության վարչությունը պարզաբանել է կատարվածը Թուրքիայի դեսպանուհու հետ և ստացել է հստակ պատասխան, որը մեջբերում ենք. «....Դեսպանուհին այդ հարցի շուրջ (ի նկատի ունեն Հայոց ցեղասպանության փաստը) արտահայտվում է շատ զգուշորեն, դիվանագիտորեն և կասկածի տակ չի դնում այն (ասել է, թե Հայոց Ցեղասպանությունը)»: «Հետևաբար,- գրում է ՆԳ պատասխանատու պաշտոնյան,-այս հարցի շուրջ ունենալով հենց իր՝ դեսպանուհու անձնական կարծիքը հայտնի դեպքերի, փաստերի հաստատման վերաբերյալ, հայտարարում եմ, որ նա ՔՕ-ի համապասխան հոդվածը չի խախտել»: Այսինքն, ըստ ՆԳ մարմնի պարզաբանման՝ թուրք դեսպանուհին, որպես պետական պաշտոնյա և դիվանագետ, չի հերքում Հայոց ցեղասպանության փաստը:

ԵՀՄՖ-ն Սլովակիայի ՆԳ նախարարության վարած աշխատանքները համարում է բավարար և ընդունում, որ Թուրքիայի դեսպանուհու տված բացատրություններն իսկապես հաստատում են Հայոց ցեղասպանության փաստը, և սրանով նա դառնում է առաջին թուրք դեսպանն աշխարհում, որն ընդունում է 1915 թվականին Օսմանյան Թուրքիայում հայերի նկատմամբ կատարված կոտորածները որպես ցեղասպանություն:

ԵՀՄՖ-ի նախագահ Աշոտ Գրիգորյանը պաշտոնական նամակ է ուղղել Սլովակիայում Թուրքիայի դեսպանուհի տ.Գյուլհան Ուլուտեկինին և պատճենը՝ Թուրքիայի ԱԳ նախարար Ահմեդ Դավութօղլուին՝ խորին շնորհակալություն հայտնելով անկեղծ խոստովանության համար, սա համարելով մեծ նվաճում հայ-թուրքական հարաբերություններում պարզություն մտցնելու կարևոր գործում: Միաժամանակ ԵՀՄՖ-ն հույս է հայտնում, որ այս առաջին ձեռքբերումը հիմք կհանդիսանա Թուրքիայի ԱԳՆ-ի համար նույն ոգով շարունակելու Հայոց ցեղասպանության շուրջ պարզաբանումները և կարճ ժամանակում գալու ընդհանուր հայտարարի, համանման հայտարարությամբ հանդես գալու արդեն ողջ աշխարհի առջև:

Ըստ ԵՀՄՖ-ի նախագահի՝ սա կլինի մեծ նվեր հայ և թուրք ժողովուրդների համար Հայոց Ցեղասպանության հարյուրամյա տարելիցին ընդհառաջ: