«Մերձավոր Արևելքում սկսված ալիքն Ադրբեջան չի հասնի». արևելագետ

Այսօր՝ լրագրողների հետ հանդիպման ժամանակ, արևելագետ Ռուբեն Սաֆրաստյանը, պատասխանելով լրագրողներից մեկի հարցին, թե Սիրիայում ընդդիմության հաղթանակի դեպքում հնարավո՞ր են հայերի զանգվածային կոտորածներ, ասաց. «Կոտորածի վտանգն ավելի մեծ կլինի քաոսի, անիշխանության պայմաններում, և Սիրիայի քրիստոնյաները պետք է պատրաստ լինեն։ Այնտեղ չկա քաղաքացիական հասարակություն. ազգայնականներին կփոխարինեն իսլամիստները, ովքեր մարդու իրավունքների հետ կապված հարցերը լուծելու են իսլամիստական սկզբունքներով»։

Նա հավելեց, որ ստեղծված պայմաններում հայ համայնքը կողմնորոշման այլընտրանք չունի և ստիպված է սատարել Ասադին։ «Այս իրադարձություններում, բացի Արևմուտքի դերակատարությունից, կա նաև ընդգծված պայքար իսլամի՝ սուննի և շիա ուղղությունների միջև։ Սիրիայի իշխանությունները շիաներին ավելի մոտ դիտարկվող ալավիներ են, ընդդիմադիրները՝ սուննիներ։ Իրանը ևս, որպես շիա ուղղությանն ավելի հակված պետություն, ճնշումների է ենթարկվում։ Այս գործոնը պետք չէ գերագնահատել, բայց այն ևս կա»,- ասաց բանախոսը։

Սաֆրաստյանը նաև նշեց, որ իր կարծիքով՝ Արևմուտքի համար էլ էր սկզբում անակնկալ արաբական երկրներում իրադարձությունների նման զարգացումը, սակայն «ԱՄՆ-ն շատ արագ կողմնորոշվեց, ն հիմա կա ճնշում՝ ապստամբություններն իրենց ուզած ուղղությամբ զարգացնելու համար»։ Հիմա արևմտյան երկրները փորձում են համաձայնության գալ իսլամիստների, մասնավորապես՝ Եգիպտոսի իշխանությունների հետ՝ խոստանալով չխոչընդոտել նրանց և ի պատասխան պահանջելով ավելի մեղմ վերաբերմունք Արևմուտքի և Իսրայելի նկատմամբ։

Իսկ հետխորհրդային երկրներում, մասնավորապես՝ առավելապես շիիզմին հակված Ադրբեջանում, նման իրադարձությունների զարգացումն արևելագետը բացառեց. «Հետխորհրդային երկրներում ուրիշ համակարգեր են գործում, ավանդույթներն ու մտածելակերպներն են տարբեր։ Մերձավոր Արևելքում ծայր առած ալիքի՝ Ադրբեջան տեղափոխվելու նշաններ չկան»։