Միայն երգով մարդուն հայրենիքում չես պահի

«Արտերկրում ծնողներն այնքան ժամանակ չունեն, որ նստեն ու երեխաների հետ զբաղվեն հայոց այբուբենի ուսուցմամբ», - այսօր տեղի ունեցած ասուլիսի ժամանակ իր մտահոգությունը հայտնեց երգչուհի Արմինե Նահապետյանը:

Նա հավելեց, որ այլ հարց է, թե իրենց երաժշտությունը որքանո՞վ է ճիշտ ազդում դրսում հայապահպանության վրա:

«Երգը շատ բան կարող է անել, բայց ամեն ինչ չի կարող անել հայապահպանության գործում: Շատ-շատ երգեր կան, որ ես ինքս մեքենայի մեջ լսում եմ, ու դրանք ինձ պահում են, որպեսզի երբևէ չհեռանամ Հայաստանից: Այո, երգը հոգևոր զենքի ուժ ունի», - նշեց Արմինկան:

Ասուլիսին մասնակցում էր նաև երգչուհի Զարուհի Բաբայանը, ով նշեց, որ Հայաստանից հեռացած մարդն իր պատճառներն ունի: «Միայն երգով մարդուն հայրենիքում պահելը շատ դժվար է», – նկատեց երգչուհին:

Իսկ թե ինչու՞ են հեռանում Հայաստանից ու դրսում կարոտում հայ երգը, երգչուհի Զարուհի Բաբայանն ասաց, որ դա արդեն քաղաքական հարց է: