ՌԴ-ն ԵԱՏՄ քաղաքացիներից կենսաչափական տվյալներ կպահանջի

Կառավարությունն առաջարկել է ավելի քան երեք ամիս ժամկետով Ռուսաստանի տարածք առանց վիզայի մուտքի հնարավորություն ունեցող միգրանտներին պարտավորեցնել կենսաչափական տվյալներ տրամադրել։ Նախարարների կաբինետը համապատասխան փաստաթուղթը ներկայացրել է Պետդումա: Օրինագծի հեղինակները նշում են, որ կենսաչափական տվյալների օգտագործմամբ միգրանտների նույնականացման անհնարինությունը ոչ միայն բարդացնում է Ռուսաստանի Դաշնությունում մնալու և երկիր չմտնելու անցանկալիության մասին որոշումների իրականացումը, այլ նաև խոչընդոտում է հետախուզվողների հայտնաբերմանը: Փաստաթղթում բացատրական նշում կա այն մասին, որ խոսքը Եվրասիական տնտեսական միության (ԵԱՏՄ) անդամ երկրներից միգրանտների մասին է: Կառավարությունն առաջարկել է նաև իրականացնել միգրանտների պարտադիր բժշկական հսկողություն: Կառավարությունը կարծում է, որ նրանց առողջական վիճակի թերի վերահսկողության և վտանգավոր հիվանդություններ ունեցող անձանց հետ կապված գործողությունների արդյունավետ ալգորիթմների բացակայության պատճառով նման հիվանդությունների Ռուսաստանի տարածք մուտք գործելու հավանականությունը զգալիորեն մեծանում է:

Ավելի վաղ հաղորդվել էր, որ 2020 թվականին 15 տարվա ընթացքում ռեկորդային թվով օտարերկրացիներ՝ 656 300 մարդ, Ռուսաստանի քաղաքացիություն է ընդունել։