Հայաստանի հետագա քայլերը Հունգարիայի դեմ՝ ըստ Հայկ Դեմոյանի

2004- 2006 թթ-ին Բուդապեշտում Գ. Մարգարյանի սպանության գործով ՀՀ ՊՆ ներկայացուցիչ Հայկ Դեմոյանը, ով պատասխանատու էր Բուդապեշտում քարոզչության և հակաքարոզչության համար, այսօրվա ասուլիսի ժամանակ անդրադառնալով վերջին զարգացումներին՝ ասաց, որ եկել է առավել սթափ գնահատականների և գործողությունների ժամանակը:

«Ռամիլ Սաֆարովը դատավարության ժամանակ հրապարակեց վտանգավոր ռազմական գաղտնիք, այն է՝ ինքը ռազմական պատրաստություն է անցել Հյուսիսային Կիպրոսի թուրքական ռազմական ստորաբաժանումներում, նա ասաց, որ իրենց այնտեղ տարբեր գործիքներով մարդ սպանել էին սովորեցնում: Դուք հասկանում եք սրա վտանգավորությունն Ադրբեջանի և Թուրքիայի համար: Ադրբեջանն անընդհատ գոռում է, թե «օկուպացվել է իր տարածքների 20 տոկոսը», մինչդեռ ինքն իր զինվորներին ուղարկում է Թուրքիայի կողմից օկուպացված տարածքում գտնվող թուրքական ռազմաբազաներ վերապատրաստման, Թուրքիան էլ ընդունում է: Այս փաստն առաջին անգամ երբ 2006-ին հրապարակեցի, Ադրբեջանում շատ թերթեր գրեցին, թե մեզ նման հերոս պետք չէ, հետո այս փաստն անուշադրության մատնվեց»,- շեշտեց Դեմոյանը՝ նկատելով, որ Ալիևը կրկնահանցագործ է. Սաֆարովին ազատելով՝ նա խախտել է իրենց Քրեական օրենսգիրքն ու ներել է ռազմական հանցագործին: Հայկ Դեմոյանի խոսքով՝ Սաֆարովը պետք է միայն Ալիևին և իր կլանին. ներքին իրավիճակից դրդված՝ անհրաժեշտ էր պատրիոտիկ ալիք բարձրացնել: Ի դեպ, Դեմոյանը չբացառեց, որ Հյուսիսային Կիպրոսում տեղակայված թուրքական բազաներում ադրբեջանցի սպաների վերապատրաստման փաստը չշրջանառվելու համար Թուրքիային այս պահին ձեռնտու չէր Սաֆարովի արտահանձնումը: Ինքը՝ Դեմոյանը, այս փաստը ժամանակին գրավոր ուղարկել է Հունգարիայում դիվանագիտական առաքելություն իրականացնող օտարերկրյա մի շարք երկրների դեսպանների:

Ըստ Դեմոյանի՝ Հայաստանը հետևյալ քայլերը պիտի ձեռնարկի բացի Հունգարիայի հետ դիվանագիտական կապերը խզելուց:

1. ՄԱԿ-ում պետք է բարձրացվի ՄԱԿ-ի ԱԽ-ում Ադրբեջանի ոչ մշտական անդամի կարգավիճակից զրկելու հարցը:

2. ՆԱՏՕ-ի առաջ պետք է բարձրացվեն Թուրքիայում ադրբեջանցի զինվորների վերապատրաստման հետ կապված հարցեր:

3. Հայկական կողմը Ադրբեջանի հակահայկական քարոզչությունը միջազգային հանրությունում պետք է ճանաչել տա որպես հանցագործություն՝ ինչպես հակասեմիտականությունը:

«Ալիևն իր անգրագետ որոշմամբ մեզ «ոսկե» քայլի հնարավորություն է ընձեռել, այն է՝ պատժիչ քայլ, եթե անհրաժեշտ լինի, իսկ առհասարակ այս ամենից կարելի է շատ օգուտներ քաղել: Մենք չպետք է մեզ ընձեռված այս հնարավորությունը բաց թողնենք»,- հավելեց Դեմոյանը:

ԼՂ հակամարտության կարգավորման գործընթացի վրա վերջին զարգացումների ազդեցության հետ կապված՝ բանախոսը նշեց, որ դա այն է, որ հայկական կողմը կոշտացրել է իր դիրքորոշումը և տեղի է ունեցել հրաժարում փոխզիջման գաղափարից:

Խոսելով արտահանձման հետևանքներից՝ Հունգարիայի դեպքում Դեմոյանը կանխատեսեց ներկառավարական լուրջ ընդհարումներ և զարգացումներ, Սաֆարովի վերադարձը Հունգարիա Դեմոյանն անգամ այս ֆոնին հավանական չհամարեց:

Անդրադառնալով միջազգային հանրության արձագանքին՝ նա նշեց, որ, հաշվի առնելով միջազգային կառույցների կողմից երկակի և եռակի ստանդարտների կիրառումը, ստացված արձագանքները սպասվածից ավելին էին: