«Ժողովուրդ». Ս. Սարգսյանը գովազդում է «Կայսերական դերձակ» հագուստ կարող ընկերությունը

Սերժ Սարգսյանն օգտվում է Եվրոպայում և ԱՊՀ երկրներում հայտնի «The imperial tailoring co» («Կայսերական դերձակ») հագուստ կարող ընկերության բրենդային ծառայություններից: Այդ մասին «Ժողովուրդ»-ը տեղեկացավ ընկերության պաշտոնական կայքից:

Ավելին, «The imperial tailoring co»-ն օրերս ՀՀ Ազգային ժողովի մեծահարուստ պատգամավորներին է ուղարկել իր արտադրանքի ժողովածուն, որպեսզի ազգընտիրներն էլ կրեն Ս. Սարգսյանի նախընտրած բրենդի կոստյումները: Այլ կերպ ասած` Ս. Սարգսյանը գովազդում է «Կայսերական դերձակ»-ը: Նշենք, որ «Տեղեկատու»-ի` «մեր հաճախորդները» բաժնում պատկերված են 7 երկրների ղեկավարների նկարները, որոնց թվում է նաև Ս. Սարգսյանը: Հագուստ պատկերողների ցանկը համալրում են նաև մի շարք երկրների գործող և պաշտոնաթող ղեկավարներ, մասնավորապես Ուկրաինայի նախկին նախագահներ Լեոնիդ Կուչման և Վիկտոր Յուշչենկոն, Հարավային Օսիայի գործող նախագահ Էդուարդ Կոկոյտին, Եմենի նախագահ Ալի Աբդուլլա Սալեխը և այլք:

Թերթը տեղեկացնում է, որ այս ընկերության ծառայությունները բավական թանկ են: Օրինակ՝ տղամարդու կոստյումի մեկնարկային գինը 688,500 ՀՀ դրամ է, տաբատինը՝ 229,500, վերնաշապիկինը՝ 76,500: Պիջակն արժե նվազագույնը 573,750 դրամ, սմոքինգ/ֆրակը՝ 1 մլն 83 հազ., վերարկուն՝ 637,500 դրամ: