Գործադիրը պետք է նախապատրաստի ԼՂՀ-ի ճանաչումը

«Տարիներ շարունակ Հայաստանը չի ճանաչում ԼՂՀ-ի անկախությունը, քանի որ ցանկություն չունի միայնակ այդ ճանաչման հեղինակը լինել։ Այսօրվա դրությամբ իրավիճակն այնպիսին է, որ այլ պետություններ ցանկություն չունեն ԼՂՀ-ն ճանաչել որպես անկախ պետություն։ Հայաստանի միայնակ ճանաչումը, ոմանց կարծիքով կարող է վնասակար լինել ընդհանուր գործընթացին։  Ես կարծում եմ՝ դա այդպես չէ, ամեն ինչ կախված է խնդրի ձևակերպումից»։ Այս մասին այսօր լրագրողների հետ հանդիպման ժամանակ ասաց ԼՂՀ նախկին արտգործնախարար Արման Մելիքյանը։

«Հայաստան ունի չօգտագործված պոտենցիալ. հաճախ, երբ ասում են, թե Հայաստանը Ղարաբաղի տարածքում զինված ուժեր ունի, ըստ էության, օկուպանտ պետություն է, պետք է ասեմ՝ Հայաստանը թե՛ պատերազմի ընթացքում, թե՛ հիմա գործում է միջազգային կոնվեցիաներին համապատասխան։  Հայաստանին պիտակավորումից ազատելու հնարավորությունները քիչ չեն։ Ես կողմ չեմ, որպեսզի ՀՀ-ը ԼՂՀ-ն ճանաչի որպես անկախ, ինքնիշխան պետություն պարզապես միանգամյա ակտով, ինչպես ամեն անգամ խորհրդարանում օրինագիծ  անցկացնելը։ Ես գտնում եմ, ԼՂՀ-ի ճանաչմանը պետք է նախորդի գործընթաց»-հավելեց վերջինս։

Իսկ Lurer.com-ի այն հարցին, թե պե՞տք է Աժ-ի օրակարգում մնա ԼՂՀ-ի ճանաչման հարցը, Արման Մելիքյանը պատասխանեց. «Ես կարծում եմ՝ լավ կլինի ԱԺ-ն նման դիմում անի գործադիր իշխանությանը, որպեսի այդ գործադիրը  նախապատրաստի ԼՂՀ ճանաչման համար անհրաժեշտ քաղաքական, իրավական նախադրյալների հիմքեր։ Նաև ձևավորի երկկողմ հանձնաժողով՝ Արցախ-Հայաստան քաղաքական հարթության վրա բոլոր անհրաժեշտ խնդիրները քննելու համար։