Կոնգրեսականները կրկին անդրադարձել են Սաֆարովի գործին

Ադրբեջանի կողմից կացնահար Ռամիլ Սաֆարովի ներումը, ծառայողական առաջխաղացումը, նրան դրամական փոխհատուցում տալը և այդ իրողությունների վնասակար ազդեցությունը Լեռնային Ղարաբաղի խաղաղ գործընթացի վրա շարունակում են ԱՄՆ կոնգրեսականների համար մտահոգության աղբյուր հանդիսանալ. հաղորդվում է Ամերիկայում Հայաստանի Ազգային կոմիտեի կայքում։

Հայկական Ցեղասպանության հարցով զբաղվող կոնգրեսական Ռոբերտ Դոլդն այսօր ասել է, որ հունգարական կառավարության կողմից Սաֆարովի հանձնումը և նախագահ Ալիևի կողմից նրա փառաբանումը «խիստ անհանգստացնող են» և նշել, որ լարվածությունը մեղմացնելու փոխարեն, այս արարքը մատնանշում է Լեռնային Ղարաբաղի հարցում հաշտեցման և խաղաղ գործընթացի բացահայտ անտեսումը։

Մեկ այլ կոնգրեսական՝ Ջոն Սարբանեսն ասել է, որ Ալիևի գործողություններն «արդարացում չունեն», և ավելացրել է հետևյալը. «Ադրբեջանի գործողություններն ուղղված էին արդարությունը քայքայելուն՝ ի վնաս բոլորի և ի շահ իր հանցագործությունը խոստովանած մարդասպանի»։

Ռոբերտ Մենենդեսը, որը միշտ շիտակորեն քննադատել է Հայաստանի և Լեռնային Ղարաբաղի դեմ Ադրբեջանի կողմից հնչող պատերազմի սպառնալիքները, ասել է, որ ինքը «զարհուրել է» Սաֆարովի արտահանձնման և նրան ներում շնորհելու փաստից և «վրդովված ու զզված» է այն ընդունելությունից, որ հայրենիքում կազմակերպվել է Սաֆարովի համար։

Մենենդեսը կոչ է արել հունգարական կառավարությանը ետ պահանջել Սաֆարովին՝ լրացնելու համար ցմահ բանտարկության մնացած ժամկետը։
Ներկայացուցիչներ Դենհամի և Նունեսի միասնական հայտարարությունում կոնգրեսականը նշել է, որ «Ադրբեջանի նախագահի որոշումը՝ ներել Ռամիլ Սաֆարովին, ով դատապարտված էր 2004 թվականին հայազգի սպա Գուրգեն Մարգարյանի սպանության համար, անտեսում է իրավունքի գերակայության նկատմամբ հարգանքը և հետ է մղում Հայաստանի և Ադրբեջանի միջև երկարատև խաղաղություն հաստատելու ջանքերը։ Այդ արարքը վերին աստիճանի հուսահատեցնող է և հետ  է մղում Լեռնային Ղարաբաղի խնդրի խաղաղ կարգավորման ջանքերը»։