Ինչու հեղափոխությունը չհասավ Արմավիր

ՔՊ-ական քաղաքապետերի նախընտրական խոստումների մասին շատերն արդեն իսկ հասցրել են մոռանալ, սակայն, մենք կփորձենք դրանք վերհանել և հասկանալ՝ որոնք են կատարվել շուրջ երկու տարվա մեջ, որոնք՝ ոչ:

Այսօր մեր խոշորացույցի տակ է հայտնվել Արմավիրի քաղաքապետ Դավիթ Խուդաթյանը: Վերջինս ընտրվելուց առաջ խոստանում էր եղած ռեսուրսները ճիշտ բաշխել ե՛ւ ճանապարհաշինության, ե՛ւ լուսավորության ցանցի ընդլայնման, ե՛ւ ոռոգման համակարգի լավացման, ե՛ւ քաղաքում մշակութային կյանքի ակտիվացման համար, ընդ որում՝ ոչ միայն համայնքային բյուջեով, այլեւ ծրագրերով, սուբվենցիոն ծրագրերով՝ ներդրողներ եւ ներդրումներ բերելով քաղաք: Ինչպես երևում է Արմավիրի քաղաքապետարանի պաշտոնական կայքից՝ քաղաքապետը դեռ չի հասել իր տված խոստումների իրականացմանը, սակայն, որպես սփոփանք կարելի է նշել, որ մշակութային միջոցառումների պակաս քաղաքում չի զգացվում: Քաղաքապետը խոստանում էր նաև հեղափոխությունը բերել քաղաք, ինչը, անշուշտ, ենթադրում էր նաև հին բարքերի վերացում: Սակայն, այս ընթացքում մամուլում բազմաթիվ հրապարակումներ եղան առ այն, որ Արմավիրի մարզպետ Համբարձում Մաթևոսյանի և Արմավիրի քաղաքապետ Դավիթ Խուդաթյանի հարաբերությունները շարունակում են լարված մնալ, և նրանք ցուցադրում են իրար հանդեպ ունեցած ոչ գործընկերային հարաբերությունները: Արմավիրի մարզպետը և քաղաքապետը անգամ առանձին-առանձին են ծաղկեպսակ դրել Արմավիրի քաղաքային զբոսայգում տեղադրված Ցեղասպանության զոհերի հիշատակի խաչքարի մոտ: Նման ներթիմային բախումներ հաճախ էինք տեսնում նաև ՀՀԿ-ում:

Դավիթ Խուդաթյանը նաև խոստանում էր, որ իրենք չեն հարստանալու, խնամի ծանոթ բարեկամներին էլ աշխատանքի չեն ընդունելու: Պարգևավճարները չեն շրջանցել նաև Արմավիրի քաղաքապետարանը, հետևաբար որոշ մարդիկ, ամեն դեպքում, հարստացել են: Բարեկամներին և ծանոթներին աշխատանքի չտեղավորելու խոստումը նույնպես սին էր, քանի որ 2019 թվականին Արմավիրի ՋԸՕ-ի վերակառուցումը ուղեկցվեց մեծ սկանդալով: Մամուլը գրում էր, որ խնդիրը ոչ թե ՋՕԸ-ի վերակազմավորումն էր, այլ այն, որ դեռևս որոշումը չկայացած, արդեն հայտնվել էին ՋՕԸ-ի ղեկավարի հավակնորդներ և հովանավորներ: Արմավիրի քաղաքապետ Դավիթ Խուդաթյանը այս պաշտոնի համար լոբբինգ էր անում իր մերձավոր Սիրաք Սարգսյանի համար: