ՏՄՊՊՀ-ն ստանձնել է «Արմենիա» ավիաընկերության «փաստաբանի» դերը

ՏՄՊՊՀ-ն այսօր տարածել է մի հաղորդագրություն, որով փորձել է բացատրել, թե որոնք են եղել՝ դեպի ՌԴ տոմսերի կտրուկ թանկացման պատճառները: ՏՄՊՊՀ տարածած հաղորդագրությունը սակայն ամբողջությամբ կրկնում է «Արմենիա» ավիաընկերության տարածած պաշտոնական բացատրությունը առ այն, որ տոմսերի թանկացման պատճառ է հանդիսացել էժան տոմսերի արագ սպառումը:

Տպավորություն է ստեղծվում, որ ՏՄՊՊՀ-ն և անձամբ կառույցի նախագահ Գեղամ Գևորգյանը ամեն գնով փորձում են պաշտպանել ավիաընկերությանը` ստանձնելով վերջինիս փաստաբանի դերը՝ աչք փակելով ակնհայտ իրողության վրա, որ որքան էլ թանկացումը պայմանավորված լիներ առավել էժան տոմսերի սպառմամբ, այդ թանկացումը չէր կարող լինել 4-5 անգամ և հասնել 700 դոլարի:

Արդյո՞ք ՏՄՊՊՀ-ն այստեղ ևս որևէ  խնդիր, իսկ ավելի հստակ՝ առիթից օգտվելով գերշահույթ ստանալու միտում չի տեսնում: Արդյո՞ք կառույցում ուսումնասիրել են, թե որքան հավելյալ եկամուտ է ստացել ավիաընկերությունը գների նման կտրուկ բարձրացման արդյունքում, իսկ որ այդ գերշահույթը եղել է՝ որևէ մեկի մոտ կասկած չի առաջանում: 

ՏՄՊՊՀ-ն քաղավիացիայի ոլորտում վերջին լայնածավալ ստուգումը իրականացրել է 2015 թվականին, «Արմենիան» հայկական շուկա է մուտք գործել 2016-ին, ստացվում է՝ դրանից հետո հայակական ավիաշուկայի խաղացողները չեն հայտնվել ՏՄՊՊՀ-ի խոշորացույցի տակ և գուցե դա է պատճառը, որ այսօր ոլորտում իրենց նման ամենաթողություն են թույլ տալիս` գների քառակի բարձրացումից հետո տարածելով ամենա պրիմիտիվ բացատրությունը, որը հետագայում իր ուսումնասիրության եզրակացության մեջ արտատպում է սպառողների շահերը պաշտպանող պետական կառույցը...