Մայք Թայսոն. Ես այլևս չեմ ուզում լինել «վատ տղա»

Գերծանրքաշային կարգի աշխարհի նախկին չեմպիոն, հայտնի բռնցքամարտիկ Մայք Թայսոնը մտադիր է նոր մասնագիտություն ձեռք բերել: Ինչպես հայտնել է 48-ամյա մարզիկը, Հոնկոնգ այցելության ժամանակ, ինքն ուզում է «երգել և պարել» մյուզիքլներում:

«Ես ուզում եմ երգել և պարել մյուզիքլներում»,- ասել է Թայսոնը՝ պատասխանելով այն հարցին, թե ինչով է մտադիր զբաղվել մարզական կարիերայի ավարտից հետո, ապա ավելացրել՝ «ես այլևս չեմ ուզում լինել «վատ տղա», իսկ ես միշտ եմ եղել այդպիսին, ով ցանկացել է դառնալ լավը, բայց չգիտեի՝ ինչպես դա անել»: Այս մասին հայտնում է gazeta.ru-ն:

Նշենք նաև, որ Թայսոնը նախկինում մասնակցել է մի քանի հեռուստատեսային ծրագրերի և նկարահանվել արվեստի մասին ֆիլմերում: Անցյալ տարի նա իր կնոջ հետ հանդես եկավ արգենտինական տանգոյի մասին հեռուստահաղորդմանը, իսկ այս տարի մասնակցեց «Մայք Թայսոն. Բացարձակ ճշմարտություն» ֆիլմի սցենարի հիման վրա բեմադրված թատերական ներկայացումում:

Նախկին բռնցքամարտիկն այցելել է Բրյուս Լիի հարազատ քաղաքը, որտեղ էլ հարգել է նրա հիշատակը։ «Բրյուս Լիի աշխարհընկալումն ու փիլիսոփայությունը հիացնում է մարդու երևակայությունը: Նա եղել է ամենալավ մարտիկը: Ես չէի ուզենա իր հետ կռվել»,- ասել է Թայսոնը: