Արդյո՞ք ՔՊ-ական քաղաքապետին նույնպես մեղադրանք կառաջադրվի

Վերլուծական 20 Փետրվար, 2021 20:12

Արդյո՞ք ՔՊ-ական քաղաքապետին նույնպես մեղադրանք կառաջադրվի

Օրերս Մեղրիի ոչ ՔՊ-ական համայնքապետի դեմ քրեական գործ է հարուցվել՝ 2008-2021թթ․-ին՝ 13 տարվա ընթացքում համայնքային բյուջե ընդհանուր 3,7 մլն դրամ քիչ հարկ գանձելու մեջ։ Այսինքն, ըստ մեղադրող կողմի, տարեկան բյուջե քիչ է գանձվել մոտ 285 000 դրամ։

Իսկ այժմ բացենք Երևանի քաղաքապետարանի 2020 թվականի բյուջեի կատարողականը, որից պարզ է դառնում, որ քաղաքապետարանը բոլոր ուղղություններով ծրագրերը թերակատարել է: Ըստ այդմ, Երեւան քաղաքի 2020 թվականի բյուջեի ծրագրված (ճշտված) 84,9 միլիարդ դրամի եկամուտների նկատմամբ փաստացի եկամուտները կազմել են 73,3 միլիարդ դրամ, կատարողականը կազմել է 86.4%։ 2020 թվականի ճշտված բյուջեով սեփական եկամուտները ծրագրվել են 27 միլիարդ դրամ, սակայն փաստացի կատարողականը կազմել է 24,5 միլիարդ, կամ՝ 90.8%։ Ըստ քաղաքապետարանի ներկայացրած փաստաթղթի` սեփական եկամուտների փաստացի հավաքագրման ցուցանիշը պակաս է 2019 թվականի համապատասխան ցուցանիշից 473 միլիոն դրամով։ Երեւանի քաղաքապետարանը հարկային եկամուտների հավաքագրումը նախորդ տարի թերակատարել է, օրինակ՝ փոխադրամիջոցների համար գույքահարկը հավաքագրվել է ծրագրվածից 312 միլիոն 884 հազար դրամով պակաս։ Տեղական տուրքերի հավաքագրումը թերակատարվել է, բայց ոչ մեծ չափի, օրինակ՝ հավաքագրումը կազմել է 3 միլիարդ 90 միլիոն դրամ, հաստատված 3 միլիարդ 158 միլիոնի դիմաց, կատարողականը կազմել է 97.8%: Ըստ էության, Երեւան քաղաքի հարկային եկամուտները եւ տուրքերը 2020 թվականի բյուջեով նախատեսվածից պակաս են հավաքագրվել 1 միլիարդ 495 միլիոն դրամով, ավելի ստույգ՝ բյուջով հաստատված է եղել 18 միլիարդ 429 միլիոն դրամ, հավաքագրվել է 16 միլիարդ 934 միլիոն դրամ։ Այդ թվում` գույքահարկի գծով հավաքագրվել է 12 միլիարդ 908 միլիոն, ծրագրված է եղել 14 միլիարդ 99 միլիոն դրամ, հողի հարկի հավաքագրումը կազմել է 561 միլիոն, ծրագրված է եղել 714 միլիոն դրամ։ Տեղական տուրքերը եւս պակաս են հավաքագրվել, օրինակ՝ ծրագրված է եղել 3 միլիարդ 158 միլիոն դրամ, հավաքվել է 3 միլիարդ 90 միլիոն դրամ, կատարողականը կազմել է 97.8%։

Այժմ հարց է առաջանում՝ իսկ պատկան մարմինները որոնք մի քանի անգամ արդեն հասցրել են աչք փակել Հայկ Մարությանի անվան շուրջ ծագած կոռուպցիոն սկանդալների վրա՝ վստա՞հ են, որ Երևանի բյուջե այդպես էլ չմտած միլիոնավոր գումարները կես ճանապարհից ինչ-ինչ կոռուպցիոն գործարքների արդյունքում չեն հայտնվել պաշտոնյաների գրպաններում: Անգամ եթե անձամբ Հայկ Մարությանը այդ ամենի հետ կապ չունի, սակայն չէ՞ որ հենց իր ղեկավարած կառույցում են տեղի ունենում նման թերակատարումները, կամ եթե կուզեք՝ թերահավաքումը: Իշխանությունների տրամաբանությամբ այսօր պետք է մեղադրանք առաջադրվեր նաև Երևանի քաղաքապետին, սակայն չի առաջադրվի, քանի որ վերջինս ունի մեկ կարևոր առավելություն Մեղրիի համայնքապետի նկատմամբ՝ նա ՔՊ-ական է...