Լեհաստանի փորձն անշուշտ օգտակար է ՀՀ-ում իրականացվող բարեփոխումների համար. փոխնախարար

ՀՀ տարածքային կառավարման նախարարի առաջին տեղակալ Վաչե Տերտերյանն այսօր ընդունեց Լեհաստանի Վելիկոպոլսկայի վոյեվոդության մարշալ Մարկ Վոզնյակի գլխավորած պատվիրակությանը: Լեհաստանցի հյուրերի այցի նպատակը Եվրամիության Արեւելյան գործընկերության շրջանակում արդյունավետ համագործակցության, ինչպես նաեւ Շիրակի մարզի հետ փոխգործակցության հարցերի քննարկումն է:

Մ. Վոզնյակը տեղեկացրեց, որ որպես Լեհաստանի խոշոր վոյեվոդության ղեկավար հետաքրքրված է Հայաստանի մարզերի հետ համագործակցությամբ եւ հույս հայտնեց, որ Շիրակի մարզում գործընկերների հետ քննարկումներն արդյունավետ կլինեն:

Մ. Վոզնյակը նաեւ ԵՄ ինքնակառավարման պաշտոնական ներկայացուցչության՝ Եվրամիության տարածաշրջանների կոմիտեի փոխնախագահն է: Անդրադառնալով ԵՄ կառույցներում գործակցության հարցերին՝ նա տեղեկացրեց, որ կոմիտեի շրջանակում մշտապես գործում է տարածաշրջանների կոմիտեի անդամներից եւ Արեւելյան գործընկերության վեց երկրների ներկայացուցիչներից կազմված խումբ, որը կոնկրետ ծրագրեր առաջարկելու ու իրականացնելու լավ հարթակ կարող է լինել: Նա նաեւ նշեց, որ որպես Արեւելյան գործընկերության նախաձեռնող երկիր՝ Լեհաստանը հետաքրքրված է մասնակից երկրների եւ, հատկապես, Հայաստանի հաջողությամբ:

Ընդգծելով, որ Լեհաստանն ապակենտրոնացման ոլոտում բավականին հարուստ փորձ ունի եւ ծանոթ է ԵՄ բոլոր ընթացակարգերին՝ նա պատրաստակամություն հայտնեց աջակցել հայաստանյան գործընկերներին՝ արդյունավետ բարեփոխումների իրականացման հարցում: «Ճանապարհի սկզբին մեզ օգնել են մեր արեւմտյան գործընկերները եւ հիմա մենք կարող ենք օգտակար լինել մյուսներին»,-նշեց նա:

Վ. Տերտերյանը շնորհակալություն հայտնեց համագործակցության պատրաստակամության համար՝ նշելով, որ Լեհաստանի փորձն անշուշտ օգտակար է Հայաստանում իրականացվող ՏԻ բարեփոխումների համար: Նա հյուրի խնդրանքով տեղեկություններ ներկայացրեց ՏԻ համակարգի, դրա զարգացման հեռանկարների, իրականացվող աշխատանքների մասին: Նշվեց, որ ոլորտի հեռանկարային զարգացման տեսանկյունից կարեւորվում է համայնքների խոշորացումը, եւ արդեն մշակվել է համապատասխան հայեցակարգ՝ հաշվի առնելով նաեւ միջազգային փորձը:

Վ. Տերտերյանը ողջունեց նաեւ ապակենտրոնացված մակարդակով համագործակցությունը խորացնելու նրանց մտադրությունը՝ նշելով, որ հայկական կողմը մեծ նշանակություն է տալիս նմանատիպ կապերի ամրապնդմանը:

Նա վստահություն հայտնեց, որ Շիրակի մարզի իրենց գործընկերների հետ տեղում քննարկումների ընթացքում կուրվագծվեն փոխշահավետ գործակցության ուղղությունները: