«Հրապարակ». Հրանտ Բագրատյանն իրավացի է

«Հրապարակ»-ը գրում է, որ երեկ Արաբկիր, Քանաքեռ-Զեյթուն համայնքների ընդհանուր իրավասության դատարանը՝ դատավոր Ռուբեն Բունիաթյանի նախագահությամբ, ամբողջությամբ մերժել է Արթուր Գրիգորյանի հայցն ընդդեմ ՀՀ նախկին վարչապետ Հրանտ Բագրատյանի:

Թերթը հիշեցնում է, որ Բագրատյանն առաջինն էր, որ, արձագանքելով «Հրապարակ»-ի և փաստաբան Արթուր Գրիգորյանի վեճին, հայտարարեց, որ թերթի էլեկտրոնային կայքում ընթերցողների գրած քոմենթները՝ Արթուր Գրիգորյան փաստաբանի մասին, իրավացի են. ինքն օգտվել է վերջինիս ծառայություններից և հրապարակավ հայտարարում է, որ նա խաբեբա է: Բագրատյանի խոսքերը և ևս հինգ անձի «Հրապարակ»-ին տված հարցազրույցները Ա. Գրիգորյանը դիտարկեց որպես վիրավորանք ու զրպարտություն և դիմեց դատարան: Ընդ որում՝ բոլոր հայցերով նա պահանջում էր մեծ փոխհատուցումներ սահմանել, պարտադրել, որ հերքեն իրենց ասածները: Իսկ որպես հայցի ապահովման միջոց՝ դատարաններն արգելանք էին դրել Գրիգորյանին քննադատել համարձակված բոլոր անձանց գույքի և նյութական միջոցների վրա:

«Հրանտ Բագրատյանի գործով վճիռն արդեն չորրորդն է, որտեղ փաստաբանը պարտություն է կրում, և դատարանը, ըստ էության, համաձայն է ինչպես մեր թերթի, այնպես էլ նշված քաղաքացիների գնահատականների հետ: Արդյունքում, անշուշտ, մենք և նշված քաղաքացիները մոտ մեկ տարի նյարդեր, ժամանակ ու միջոցներ վատնեցինք, սակայն հուսանք' հասարակությունը համոզվեց, որ գրիգորյանների նմաններին չի կարելի վստահել սեփական իրավունքների պաշտպանությունը»,- գրում է «Հրապարակ»-ը: