Գլխավոր քարտուղար. ԱՄՆ-ի նախագահական ընտրությունները ՆԱՏՕ-ի պլանների վրա չեն ազդի

ՆԱՏՕ-ի գլխավոր քարտուղարը՝ Անդրես ֆոգ Ռասմուսենը Euronews հեռուստաընկերությանը տված հարցազրույցի ժամանակ հայտարարել է, որ 2012 թվականի նոյեմբերին ԱՄՆ-ում կայանալիք նախագահական ընտրությունները ոչ մի կերպ չեն կարող ազդել Դաշինքի՝ Եվրոպայում հակահռթիռային պաշտպանողական համակարգ տեղակայելու որոշման վրա:

Հարցին, թե արդյոք կապված է ծրագրի հետագան Ռուսաստանի վախերի հետ՝ կապված ԱՄՆ-ի նախագահի հավանական հաղթողի հետ, Ռասմուսենը պատասխանել է. «Ո՛չ: Մենք պարզաբանել ենք Մոսկվային, որ Եվրոպայում  նման համակարգի ստեղծումն իր մեջ չի պարունակում Ռուսաստանին հարված հասցնելու վտանգ»:

Գլխավոր քարտուղարը նաև ասել է. «Հիշեցնեմ, որ Ռուսաստանը և ՆԱՏՕ-ն 1997 թվականին փաստաթուղթ են ստորագրել, որում պարզ ասված է, որ Հյուսիսատլանտյան դաշինքը և Ռուսաստանը չպետք է ուժ կիրառեն միմյանց նկատմամբ: Մենք հավատարիմ ենք մեր խոստմանը: Ես հույսով եմ, որ Ռուսաստանը նույնպես հավատարիմ կմնա դրան։ Մենք առաջարկել ենք ստեղծել համատեղ կենտրոն, որպեսզի Ռուսաստանը տեսնի, որ մեր համակարգը ուղղված չէ իր դեմ»։

Ավելի վաղ Վլադիմիր Պուտինը հայտարարել է, որ ԱՄՆ-ի նախագահի թեկնածու Միթ Ռոմնիի հայտարարությունները Ռուսաստանի հետ կապված հաստատում են Ռուսաստանի՝ տվյալ հարցի շուրջ ունեցած տեսակետը:

«Նա ևս մեկ անգամ հաստատեց հակահրթիռային պաշտպանության մասին մեր ունեցած տեսակետի ճշտությունը: Ոչ միայն մեզ համոզեց դրանում, այլև մեր եվրոպական գործընկերներին»,-ավելացրել է նա։