Հունգարիան պետք է ներողություն խնդրի Հայաստանից. Հունաստանում Հայաստանի դեսպան

Ողջ աշխարհի հայությունը բողոքում է 2004 թվականին Բուդապեշտում հայազգի սպա Գուրգեն Մարգարյանին կացնահարած Ռամիլ Սաֆարովի ազատ արձակման դեմ. գրում է CyprusMail-ը։

Այս առիթով խոսել է Հունաստանում Հայաստանի դեսպան Գագիկ Ղալաչյանը. 

«Հունգարիան պետք է ներողություն խնդրի միջազգային հանրությունից և Հայաստանից և ձեռնարկի Ադրբեջանից ստացած ապտակին համարժեք քայլեր։ Հակառակ դեպքում՝ մենք կշարունակենք համարել, որ Հայաստանի նկատմամբ այդ ոչ բարեկամական քայլը կանխամտածված էր։ Մենք հավատում ենք, որ Ադրբեջանն այս արարքով մեկ անգամ ևս, և արդեն վերջնականորեն, միջազգային հանրության աչքերում կորցրեց վստահելի գործընկեր լինելու ցանկացած հեռանկար։ Մենք հույսով ենք և մենք աշխատում ենք այն ուղղությամբ, որպեսզի միջազգային հանրությունը վերջապես դադարեցնի կեղծ հավասարության քաղաքականությունը»։

Ղալաչյանը նաև ավելացրել է, որ ՄԱԿ-ը, ԵԱՀԿ-ը, Եվրոպայի Խորհուրդը, ՆԱՏՕ-ն, ԱՄՆ-ը, Ռուսաստանը, Ֆրանսիան և տասնյակ այլ պետություններ ու կազմակերպություններ արձագանքել են այդ միջադեպին և հայտնել իրենց աջակցութունը Հայաստանի Հանրապետությանը։

Հիշեցնենք, որ Սաֆարովը Հունգարիայում դատապարտվել էր ցմահ բանտարկության, բայց հունգարական իշխանությունների կողմից արտահանձնվել էր Ադրբեջանին, որտեղ և նրան ներում էին շնորհել։ Ադրբեջանում Սաֆարովին դիմավորել են հերոսի պես, մայորի կոչում տվել և փոխհատուցել նրա բանտարկության ութ տարիների աշխատավարձը։

Չնայած հունգարական իշխանությունները պնդում էին, որ Ադրբեջանը խոստացել է, որ Սաֆարովը կշարունակի կրել պատիժը հայրենիքում, աշխարհասփյուռ հայերը պահանջում են չեղյալ հայտարարել ներումը և Սաֆարովին վերադարձնել բանտ։