Հայկ Չոբանյանի՝ «սառույցին գրված» խոստումները

Այն բանից հետո, երբ համացանցում լուրեր տարածվեցին Տավուշի մարզում ադրբեջանցիների gps-յան ակտիվության մասին,  Տավուշի մարզպետ Հայկ Չոբանյանը հանդես եկավ պաթոսախառն գրառմամբ, որտեղ հող հանձնելու մասին լուրեր տարածողներին անվանեց կեղծավոր անբարոյականներ, ովքեր վտանգում են մեր սահմանային անվտանգությունը: Իրավիճակի ողջ աբսուրդը կայանում է նրանում, որ ահազանգողները հենց Տավուշի սահմանամերձ շրջանների բնակիչներն էին, ըստ էության, մարզպետը հենց նրանց է անվանում անբարոյական և կեղծավոր` մոռանալով, որ իր թիմն է հող հանձնել և իր թիմն է վտանգում Հայաստանի սահմանների անձեռնմխելիությունը:

Իսկ ի՞նչ է արել պաշտոնավարման ընթացքում մարզպետը, որ այսօր այդպես հոխոռտում է իր մարզի բնակիչների վրա, խոստումներից քանի՞սն է կատարել: 

Մարզպետը նշանակվելուց օրեր անց հայտարարում էր Տավուշը էկոլոգիական դրախտի վերածելու իր մտադրության մասին:  Այսօր արդեն Տավուշում հանք կառուցելու մասին խոսակցություններ են գնում: Պարզապես հանրային արձագանքը այդ ծրագրին սպասվածից ավելի խիստ եղավ, հանրային լսումները ժամանակավորապես կասեցվեցին, սակայն իրավիճակը ավելի շատ նման է ժամանակ շահելու փորձի, քան հանք կառուցելու գաղափարից վերջնականապես հրաժարվելու: Եթե հանք կառուցելու ծրագրերը իրականություն դառնան՝ տավուշցիները ընդհանրապես կմնան առանց ոռոգման ջրի:

Իջևանյան հայտնի դեպքերից հետո ամենաբարձր մակարդակով հանրությանը հավաստիացնում էին, որ ծառահատման ցանկացած դեպք պատժվելու է օրենքի ողջ խստությամբ: Թե որքանով է այդ գործընթացը կասեցվել` կարելի է դատել այն հանգամանքից, որ անտառահատները շատ հանգիստ շարունակում են իրենց սև գործը անել. համացանցում և մամուլում վերջին օրերին պարբերաբար հայտնվում են հրապարակումներ առ այն, որ Իջևանի մի շարք բնակիչներ շարունակում են ապօրինի անտառահատումը մի պարագայում, երբ մարզպետ Չոբանյանը հայտարարել էր, որ նման դեպքեր այլևս չեն արձանագրվի: Արձանագրվում են, հետևաբար, արվում են նաև հետևություններ:

Մարզպետը խոստացել էր, որ կվերագործարկվի Տավուշի մարզային հեռուստաընկերությունը, այդ խոստումը նույնպես գրվեց սառույցին:

Սրանք ընդամենը մի քանիսն են մարզպետ Չոբանյանի տրված և չկատարված խոստումներից: Այսքանից հետո վերջինս դեռ փորձում է հոխոռտալ հանրության վրա, հաթաթա տալ սեփական երկրի մասին չմտածելու համար...