Մուհամմեդ Մուրսի. Իմ ժողովուրդը քաղաքակիրթ է և զերծ է նման անօրինական պահվածքից

Եգիպտոսի նախագահ Մուհամմեդ Մուրսին հայտարարել է, որ ինքը և իր ժողովուրդը ոչ մի անմիջական առնչություն չունեն Կահիրեում և Բենգազիում ԱՄՆ դեսպանատան վրա կազմակերպված հարձակումների մեջ.«Իմ ժողովուրդը զերծ է նման անօրինական պահվածքից»: Նա միաժամանակ խնդրել է ԱՄՆ նախագահ Բարաք Օբամային՝ կանգնեցնել իսլամի նկատմամբ թշնամանք տարածող ֆիլմեր նկարահանողներին:

Մուրսին դատապարտել է ԱՄՆ դեսպանատան վրա կազմակերպված հարձակումները Կահիրեում և Բենգազիում: «Եգիպտացիները շատ քաղաքակիրթ ժողովուրդ են, և նրանք հեռու են նման ապօրինի պահվածքից»,-ասել է նա հինգշաբթի օրը Բրյուսել կատարած իր այցի ժամանակ: Մենք պարտավոր ենք պաշտպանել բոլոր մեր այցելուներին, զբոսաշրջիկներին և դիվանագիտական առաքելություն կատարող գործիչներին: Եգիպտոսը պետք է սերտ համագործակցի ինչպես ԵՄ, այնպես էլ ԱՄՆ իշխանությունների հետ՝ նման դեպքերը ապագայում բացառելու համար:

Մուրսին հայտարարել է, որ նա չորեքշաբթի օրը հեռախոսային խոսակցություն է ունեցել նախագահ Օբամայի հետ՝ խնդրելով դադարեցնել իսլամական աշխարհում նման սուր քննադատության արժանացած թշնամական ֆիլմերի արտադրությունը:

Ի պատասխան Օբաման հայտնել է, որ բարձր է գնահատում ԱՄՆ աշխատակիցների անվտանգության մասին Մուրսիի մտահոգությունը, հաղորդում է Սպիտակ տունը: