Ուժային բլոկի «բարեփոխումները». Փաշինյանն անձնական գվարդիա է ստեղծում

Վերջին շրջանում Նիկոլ Փաշինյանը ակտիվորեն սկսել է բարեփոխել ուժային բլոկը; Անչափ կարևոր է հասկանալ, թե ինչ նպատակ է հետապնդում վարչապետը՝ նմանատիպ փոփոխություններ կատարելով: Դիցուք՝ Փաշինյանը որոշել է ստեղծել ներքին գործերի նախարարություն: Այսօր արդեն ազդարարվեց, որ այդ գործընթացը օրակարգային է և մեկնարկել է: Նիկոլ Փաշինյանի ինչի՞ն է պետք ոստիկանության նմանատիպ ռեֆորմը, եթե հաշվի առնենք, որ ներքին գործերի նախարարություն ստեղծելու գաղափարը նախկին վարչապետ Հովիկ Աբրահամյանինն է, որին ժամանակին ընդիմացավ ոստիկանապետը, և այդ գաղափարը այդպես էլ միս ու արյուն չստացավ:

Տվյալ ռեֆորմով Նիկոլ Փաշինյանը միաժամանակ մի քանի խնդիր է լուծում: Նախ և առաջ` ոստիկանությունը մտնելու է ներքին գործերի նախարարության մեջ, հետևաբար դառնում է առավել վերահսկելի:

Ներքին գործերի նախարարի պաշտոնը քաղաքական է լինելու, հետևաբար Փաշինյանը այլևս ստիպված չի լինելու ոստիկանության ղեկավար նշանակել կադրային սպայի: Ինչպես գիտենք՝ սպաների հետ Փաշինյանը հեշտությամբ լեզու չի գտնում, ինչը չես ասի իր հետ քայլած երիտասարդների մասին, որոնցից մեկն էլ, ըստ էության, դառնալու է այդ նոր սուպեր նախարարության ղեկավարը: Ստեղծվելու է ազգային գվարդիա, որը կզբաղվի և՛ պետական պահպանությամբ, և՛ անհրաժեշտության դեպքում զանգվածային անկարգությունների կանխմամբ ու խափանմամբ: Այսինքն՝ Փաշինյանը այս ռեֆորմով ստեղծում է իր սեփական մինի-բանակը, որը միտված է լինելու կոնկրետ քաղաքական խնդիրների լուծմանը և ընդդիմադիր սեգմենտի հետ հաշվեհարդար տեսնելուն:

Հաջորդ ռեֆորմը վերաբերվում է ԱԱԾ-ին: Փաշինյանը ցանկանում է ԱԱԾ վերահսկողության տակից դուրս բերել ՊՊԾ-ն և այն դարձնել վարչապետին ենթակա մարմին: Հարկ է նշել՝ սա նշանակում է, որ վարչապետ Նիկոլ Փաշինյանը չի վստահում նաեւ այս ԱԱԾ տնօրենին, քանի որ իր անձնական պաշտպանությունը ՊՊԾ-ի միջոցով ԱԱԾ-ն էր իրականացնում։ Արդյո՞ք սրանից շահելու է ուժային համակարգը՝ իհարկե ոչ, սակայն Փաշինյանին դա չի հուզում, նա լուծում է իր անվտանգության հարցը:

Հաջորդ փոփոխությունը նույնպես իր տակ որոշակի տողատակեր է պարունակում: ՀՀ ԶՈՒ ԳՇ նախկին պետ, գեներալ-լեյտենանտ Արտակ Դավթյանը պաշտպանության նախարար Վաղարշակ Հարությունյանի հրամանով ՊՆ-ում նոր պաշտոն ստացավ՝ հատուկ հանձնարարությունների գծով ավագ սպա: Որոշ տեղեկություններով, այդ պաշտոնը ստեղծվել է հատուկ նրա համար․ Փաշինյանը Դավթյանին որոշել է գործուղել ԳՇ՝ երկիշխանություն ստեղծելու եւ Օնիկ Գասպարյանի վրա հոգեբանական ճնշում գործադրելու համար։ Ուշագրավ է, որ Փաշինյանի լրատվամիջոցը, որն առաջինը հայտնեց այս նշանակման մասին, գրել էր, որ Ա․ Դավթյանը «ԳՇ-ում» նշանակվել է հատուկ հանձնարարությունների գծով ավագ սպա, ավելի ուշ հրապարակման միջից հանվեց «ԳՇ» բառը, քանի որ օրենքով սահմանված է ԳՇ կազմը, եւ նման հաստիք գոյություն չունի։

Ինչպես տեսնում ենք` ուժային բլոկում ակտիվ վերափոխումներ են տեղի ունենում, որոնք բնավ էլ չեն բխում համակարգի շահերից, քանի որ ակնհայտ է, որ այդ վերափոխումների հիմքում Նիկոլ Փաշինյանի ցանկությունն է՝ ուժային բլոկը ավելի վերահսկելի դարձնելն է և իշխանության պահպանման խնդրի լուծումը: Մինչդեռ ուժային բլոկը էլ ավելի է բզկտվում, ինչն էլ նշանակում է, որ Հայաստանի անվտանգային համակարգը  զգալիորեն թուլանում է, թերևս երկրորդ նպատակը, որ հետապնդում է Նիկոլ Փաշինյանը վերը նշված բարեփոխումներով, հենց դա է...