ՔՊ-ական քաղաքապետի՝ «ոչինչ չանելու նուրբ արվեստը»

Նիկոլ Փաշինյանի թիմակից ՔՊ-ական քաղաքապետերը շարունակում են զարմացնել հանրությանն իրենց տված խոստումների կատարման տեմպերով: Զարմացնել՝ վատ առումով, քանի որ ի սկզբանե խոստումները շատ էին, իսկ ահա երկու տարի անց ժողովուրդը կանգնել է պայթած փուչիկի առջև: Դիցուք՝ Արմավիրի քաղաքապետ Դավիթ Խուդաթյանը:

Վերջինս ընտրվելուց առաջ խոստանում էր եղած ռեսուրսները ճիշտ բաշխել ե՛ւ ճանապարհաշինության, ե՛ւ լուսավորության ցանցի ընդլայնման, ե՛ւ ոռոգման համակարգի լավացման, ե՛ւ քաղաքում մշակութային կյանքի ակտիվացման համար, ընդ որում՝ ոչ միայն համայնքային բյուջեով, այլեւ ծրագրերով, սուբվենցիոն ծրագրերով՝ ներդրողներ եւ ներդրումներ բերելով քաղաք: Ինչպես երևում է Արմավիրի քաղաքապետարանի պաշտոնական կայքից՝ քաղաքապետը դեռ չի հասել իր տված խոստումների իրականացմանը, սակայն, որպես սփոփանք կարելի է նշել, որ մշակութային միջոցառումների պակաս քաղաքում չի զգացվում:

Արմավիրի քաղաքապետի պաշտոնում Դավիթ Խուդաթյանի ընտրությունը շատերի կողմից դիտարկվեց իբրև հեղափոխությունը մարզեր արտահանելու կարևորագույն քայլ: Խուդաթյանն էլ իր հերթին ընտվելուց հետո հպարտանում է մի շարք ձեռքբերումերով, որոնց ավելի խորքային դիտարկման դեպքում, սակայն, պարզ է դառնում, որ դրան մեծ մասով ներկայիս քաղաքապետը պարտական է իր նախորդին՝ Ռուբեն Խլղաթյանին: 

Խուդաթյանը հպարտանում է երեք հիմնական ձեռքբերումներով՝ աղբահանության խնդրի լուծում, լուսավորության և գյուղատնտեսական խնդիրների: Արմավիր քաղաքում հայ-չեխական «Գրինէկո-Կաս» ՍՊԸ-ն նսխատեսել էր կառուցել աղբի վերամշակման գործարան եւ ջերմոցային տնտեսություն հիմնել: Այդ մասին որոշումը  ընդունվել է և համաձայնությունը կողմերի միջև ձեռք է բերվել դեռևս 2015 թվականին: Աղբի վերամշակման գործարանի կառուցման և ջերմոցային տնտեսություն հիմնելու համար ընկերությունը 17 մլրդ 490 մլն ՀՀ դրամի չափով (մոտ 37 միլիոն դոլլար) ներդրում պետք է  իրականացներ: 

Սոցիալապես անապահով ընտանիքների երեխաների համար ամառային ճամբարներ կազմակերպելու նոու-հաուն նույնպես Խուդաթյանինը չէ, նմանատիպ ճամբարներ Արմավիր քաղաքում քաղաքապետի հանձնարարականով կազմակերպվել են յուրաքանչյուր տարի: 

Հարց է առաջանում՝ ի՞նչ է արել իր պաշտոնավարման ընթացքում Արմավիրի քաղաքապետը, եթե մինչ օրս վայելում է իր նախորդի կատարած աշխատանքի արգասիքները…