Ինչու է թանկացել բենզինի և դիզելային վառելիքի գինը. ՏՄՊՊՀ-ն մեկնաբանում է

Ինչպես հայտնել էինք օրեր առաջ, բենզինը կրկին թանկացել է:

ԼՈՒՐԵՐ.com-ի հետ զրույցում բենզինի թանկացումը ՏՄՊՊՀ-ից մեկնաբանեցին հետևյալ կերպ. «Հանձնաժողովը 2020 թվականի դեկտեմբերի 1-ից մինչև 2021 թվականի հունվարի 14-ն ընկած ժամանակահատվածում արձանագրել է վառելիքի տարբեր տեսակների իրացման գների թանկացումներ մասնավորպես 10-ից մինչև 30 դրամի սահմաններում։ Ուսումնասիրության արդյունքում պարզվել է, որ բեզինի և դիզելային վառելիքի իրացման գների փոփոխությունները պայմանավորված են մի քանի հիմնական գործոններով՝ նավթի և նավթամթերքի համաշխարհային շուկաներում տեղի ունեցած գործընթացներով, մասնավորապես՝ շուկայական գործընթացների բնականոն ընթացքի վերականգնմամբ, ՀՀ դրամի փոխարժեքի արժեզրկմամբ, ձեռքբերման գների բարձրացմամբ»,- հայտնեցին ՏՄՊՊՀ-ից:

ՏՄՊՊՀ-ից հավելեցին նաև, որ նավթը բենզինի և դիզելային վառելիքի արտադրական ինքնարժեքում շատ փոքր մասնաբաժին ունի (կախված տարբեր երկրների հարկային և մաքսային վարչարարություններից` մինչև 10%), և այս պարագայում բենզինի և դիզելային վառելիքի իրացման գների նվազման հիմնական պատճառը այդ ապրանքատեսակների նկատմամբ պահանջարկի կտրուկ անկումն է՝ պայմանավորված գործող սահմանափակումներով:

Զվարթ Պետրոսյան