Պետական գաղտնի՞ք. ինչո՞վ էր պայմանավորված այդքան դիպուկահարների ներկայությունը ԱԺ-ում

Մարտի 3-ին Ազգային ժողովի շենքն ու հարող տարածքը հսկում էին մի խումբ դիպուկահարներ։ 
Թե ինչո՞վ էր պայմանավորված այդքան դիպուկահարների ներկայությունը և արդյո՞ք որևէ վտանգի մասին տեղեկություն էին ստացել, բոլորիս է հետաքրքրում, քանի որ տեղի էր ունենում ընդդիմադիրների հերթական հավաքը և որևէ այլ գործողության մասին նախապես հայտարարված չէր: Հարցի պատասխանը ստանալու համար դիմել էինք Ազգային անվտանգության ծառայության մամուլի կենտրոն, սակայն այստեղից հայտնել են, որ տեղեկություն տրամադրել չեն կարող՝ պատճառաբանելով, որ այն դասվում է պետական և ծառայողական գաղտնիքի շարքին: 
«Հատուկ պետական պաշտպանության ենթակա անձանց ապահովման մասին» ՀՀ օրենքի 3-րդ հոդվածում ամրագրված է, որ պետական պահպանությունն իրականացվում է գործունեության բացահայտ և գաղտնի մեթոդների ու միջոցների կիրառման համակցության սկզբունքներով: Հայցվող տեղեկությունը ընդգրկված է գաղտնագրման ենթակա տեղեկությունների հաստատված ցանկում, ուստիև, նույն օրենքի համաձայն, դասվում է պետական և ծառայողական գաղտնիքի շարքին»,- պարզաբանել են ԱԱԾ-ից:

Նշել են նաև, որ ծառայության հիմնական խնդիրներից է պահպանվող օբյեկտները պաշտպանելը և պարտավոր են կազմակերպել և իրականացնել պետական պահպանության օբյեկտների անվտանգության ապահովմանն ուղղված պահպանման, ռեժիմային, տեխնիկական և այլ միջոցառումներ:

Հիշեցնենք՝ մարտի 3-ը ԱԺ-կառավարություն հարցուպատասպանի օրն էր, որին մասնակցում էր վարչապետ Նիկոլ Փաշինյանը, իսկ դրսում՝ ԱԺ շենքի դիմաց օրեր շարունակ վերջինիս հրաժարականը պահանջող ընդդիմադիրներն էին:

Սոնա Հարությունյան

ԱԱԾ-ի պատասխանն ամբողջությամբ՝ ստորև 

Լուսանկարը՝ photolur-ի