Այս փուլում կարևոր է հարգանք դրսևորել միջազգային մարդասիրական իրավունքի հանդեպ. Անն Լինդե
Արտաքին Քաղաքական
ԵԱՀԿ գործող նախագահ, Շվեդիայի արտաքին գործերի նախարար Անն Լինդեն ընդգծում է, որ Լեռնային Ղարաբաղում հրադադարի մասին նոյեմբերի 10-ի համաձայնագրից հետո իրավիճակը տարածաշրջանում փոխվել է. նրա գնահատմամբ հրադադարի համաձայնագրի իրականացումը հիմք կտրամադրի առաջ գնալ կոնֆլիկտի լուծման հարցում: Անն Լինդեն նման կարծիք հայտնեց ՀՀ ԱԳ նախարար Արա Այվազյանի հետ հանդիպումից հետո մամուլի համար հայտարարությունների ընթացքում:
«Ես ողջունում եմ հրադադարը և, առիթից օգտվելով, ուզում եմ արտահայտել իմ խորը ափսոսանքը վիրավորվածների և մահացածների կապակցությամբ: Որպես ԵԱՀԿ գործող նախագահ՝ ողջունում եմ Մինսկի խմբի համանախագահների աշխատանքը և մեր անձնական ներկայացուցչի ջանքերը՝ գտնելու երկարաժամկետ կայուն լուծում: Մի քանի հարցեր դեռևս կարոտ են լուծման: ԵԱՀԿ-ն և միջազգային հանրությունը որպես ամբողջություն կարևոր դեր ունեն անմիջական իրավիճակին անդրադառնալու և առաջ ընթանալու ճանապարհ գտնելու գործում»,- ասաց Լինդեն:
Նրա խոսքով՝ այս փուլում կարևոր է հարգանք դրսևորել միջազգային իրավունքի հանդեպ, ներառյալ՝ միջազգային մարդասիրական իրավունքը: Անն Լինդեն շեշտեց նաև վստահության կառուցման անհրաժեշտությունը: Նա նշեց, որ այս այցը հնարավորություն է ընձեռել քննարկել Շվեդիայի նախագահության առաջնահերթությունները ԵԱՀԿ-ում:
ՈՒՂԻՂ ԵԹԵՐ
Ամենադիտված 
Ծնողները մահացել են, 3 երեխաները հիվանդանոցում են. նոր մանրամասներ ողբերգական վթարից
