AstraZeneca պատվաստանյութից հրաժարվող երկրների թիվը շարունակում է աճել

AstraZeneca դեղագործական ընկերության` կորոնավիրուսի դեմ պատվաստանյութից հրաժարվող երկրների թիվը շարունակում է աճել։ Ընկերության հետ համագործակցությունը դադարեցրել են նաև  Գերմանիայի, Ֆրանսիայի և Իտալիայի իշխանությունները։
Ինչպես հայտնում է FOCUS պորտալը՝ հղում կատարելով Գերմանիայի առողջապահության նախարարության ներկայացուցչին, Բեռլինը նման որոշում է կայացրել՝ հետևելով Պոլ Էրլիչի ինստիտուտի առաջարկությանը, որը վերահսկում է երկրում դեղերի շրջանառությունը: Ըստ ուսումնասիրությունների՝ AstraZeneca պատվաստանյութի պատճառով՝ պատվաստվածների մոտ առաջացել է թրոմբոզ: Ֆրանսիայի նախագահ Էմանուել Մակրոնն իր հերթին ասել է, որ երկրում պատվաստումը դադարեցվել է այնքան ժամանակ, քանի դեռ դեղերի եվրոպական գործակալությունը (EMA) չի հայտնել պատվաստանյութի անվտանգության վերաբերյալ իր կարծիքը: Նույն որոշումը կայացվել է նաև Հռոմում: Ինչպես պարզաբանել է Իտալիայի դեղերի գործակալությունը (Aifa), այն ուժի մեջ է մինչև EMA հայտարարությունը:
Ավելի վաղ հայտնի դարձավ, որ Իսպանիայի իշխանությունները նույնպես դադարեցրել ենպատվաստանյութի օգտագործումը: Իսպանիայի օրինակին հետևեցին նաև Ավստրիան, Էստոնիան, Լիտվան, Լյուքսեմբուրգը, Լատվիան, Դանիան, Նորվեգիան, Իսլանդիան, Նիդեռլանդները, Բուլղարիան, Ռումինիան: 
AstraZeneca-ն ինքը պնդում է, որ իր պատվաստանյութը անվտանգ է։