«Թավշյա ծաղր». պոպուլիզմի թիրախում այժմ էլ կենսաթոշակառուներն են

ՀՀ աշխատանքի և սոցիալական հարցերի նախարարությունը շրջանառության մեջ է դրել «Պետական կենսաթոշակների մասին» ՀՀ օրենքի փոփոխությունների և լրացումների մասին նախագիծը, որով բարեփոխումներ են առաջարկվում մի շարք ուղղություններով: Նախագիծը դրված է հանրային քննարկման, արդյունքներն ամփոփվելուց հետո այն կներկայացվի կառավարությանը, որից հետո նախագիծը կմտնի ԱԺ։

Փոփոխությունների համաձայն՝ առաջին և երկրորդ խմբի հաշմանդամություն ունեցող անձինք և 90-ից բարձր կենսթաշակառուները թոշակին հավելում կստանան: Ըստ պաշտոնական վիճակագրության` Հայաստանում  400 հազարից ավել կենսաթոշակառու է գրանցված, հարց է առաջանում՝ նրանցից քանի՞սն են բոլորել 90-ամյակը: Հաշվի առնելով Հայաստանում կյանքի տևողության կտրուկ կրճատումը և կյանքի որակը՝ դժվար չէ կռահել, որ աննշան տոկոսը: 

Վարչապետ Նիկոլ Փաշինյանն ամիսներ առաջ հայտարարում էր, որ բյուջեում գումարի խնդիր չկա, և նախարարությունները կարող են մշակել իրենց հեղափոխական ծրագրերը: Այդ դեպքում ինչո՞ւ ծաղրել կենսաթոշակառուներին և հանրության աչքերին թոզ փչելու նպատակով գնալ կենսաթոշակառուների ամենափոքր խմբի թոշակների ավելացման՝ ցույց տալու համար, որ գործ են անում և թուլացնելու սոցիալական լարվածությունը: Եթե բյուջում իսկապես չկա գումարի խնդիր՝ ինչո՞ւ չբարձրացնել կենսաթոշակները և նպաստները քաղաքացիների ավելի մեծաթիվ խմբերի համար, ինչպես երևում է` անգամ ստեղծված իրավիճակում Փաշինյանի կառավարությունը չի հրաժարվում պոպուլիստական քայլերից...