Մշակույթի նախարարության կայքէջը խղճուկ վիճակում է

2011 թվականին խոսքի ազատության պաշտպանության կոմիտեն (ԽԱՊԿ) իրականացրել է ՀՀ պետական մարմինների կայքերի մոնիտորինգ՝ դրանց տեղեկատվական թափանցիկության մակարդակը գնահատելու նպատակով: Կայքերում գնահատվել են՝ հրապարակված տեղեկությունների առկայությունը, օպերատիվությունը և հասանելիությունը:

«Հետազոտությունը կատարել ենք երկու փուլով: Առաջին փուլի արդյունքները հրապարակելուց հետո՝ ԽԱՊԿ փորձագետները պաշտոնական կայքերի էական բարելավում նկատեցին»,- ասաց Խոսքի ազատության պաշտպանության կոմիտեի նախագահ Աշոտ Մելիքյանը:

Նա նշեց, որ երկրորդ փուլից հետո առաջատարների փոփոխություն տեղի ունեցավ, ինչպես նաև բոլոր կայքերն առանց որևէ խնդրի հետազոտվում և բացվում էին:

«Սակայն հետազոտությունից հետո վստահաբար կարող եմ ասել, որ կայքերում տեղեկատվությունը ոչ ամբողջական է, կամ էլ չի տեղադրվում»,- հայտարարեց Աշոտ Մելիքյանը:

Նա նշեց, որ որպես կանոն բոլոր կայքերում պակասում է բյուջեի մասին ինֆորմացիան, ինչպես նաեւ բացակայում է ինֆորմացիան այն մասին, թե որ պաշտոններն են ազատ. «Դա բոլոր կայքերի թերացումն է»,- նկատեց Աշոտ Մելիքյանը:

Իսկ այն հարցին, թե որ նախարարության կայքն է ավելի վատ աշխատում, ԽԱՊԿ նախագան պատասխանեց, որ բովանդակային առումով խղճուկ վիճակում է Մշակույթի նախարարության կայքէջը:

«Սակայն որոշ նախարարություններ մեզ մոտ ավելի բաց են աշխատում, քան ՌԴ-ում»,- եզրափակեց Աշոտ Մելիքյանը: