Թուրքիայում անցկացվել են բողոքի ակցիաներ Ստամբուլյան կոնվենցիայից դուրս գալու կապակցությամբ (տեսանյութ)

Թուրքիայում հազարավոր մարդիկ բողոքի ցույց են անցկացրել՝ նախագահ Ռեջեփ Թայիփ Էրդողանին կոչ անելով հետ կանչել Եվրոպայի խորհրդի՝  Կանանց նկատմամբ բռնության կանխարգելման մասին Ստամբուլյան կոնվենցիայից դուրս գալու իր որոշումը, հայտնում է Guardian-ը: Ստամբուլում ցուցապաստառներով ցուցարարները դուրս են եկել փողոցներ՝ վանկարկելով. «Մենք չենք վախենում. չենք ենթարկվելու»: Լրատվամիջոցների հաղորդմամբ՝ այսպիսի գործողություններ տեղի են ունեցել նաև Անկարայում և Իզմիրում:

Ստամբուլում ստորագրված Եվրոպայի խորհրդի կոնվենցիան պարտավորեցնում է կանխել և արմատախիլ անել ընտանեկան բռնությունը իրավական մակարդակում: Թուրք պահպանողականներն ասում են, որ Ստամբուլյան կոնվենցիան խարխլում է ընտանեկան արժեքները: Նրանք նաև թշնամաբար են տրամադրված գենդերային հավասարության սկզբունքի նկատմամբ և այն դիտում են որպես համասեռամոլության քարոզ: