ԱՄՆ–ում մոր կողմից վիրավորված երկու երեխաները մահացել են հիվանդանոցում

ԱՄՆ–ի Տեխաս նահանգի Լարեդո քաղաքի առողջապահության եւ սոցիալական ծառայությունների կենտրոնում մայրը վիրավորել էր իր երկու մանկահասակ երեխաներին, ովքեր մահացել են հիվանդանոցում։ Այս մասին հաղորդում է «Associated Press» լրատվական գործակալությունը։ 

10-ամյա Թիմըթի Գրիմըրը մահացել է դեկտեմբերի 8-ին Սան Անտոնիո քաղաքային հիվանդանոցում, իսկ նրա 12-ամյա քույրը՝ Ռամին, մահացել էր դեկտեմբերի 7-ին:

38-ամյա Ռեյչել Գրիմըրը կրակել էր իր երեխաներին, այն բանից հետո, երբ հրաժարվել էին նրան վճարել սննդի համար նախատեսված պետական նպաստը։ Մայրն իր երկու երեխաներին ծանր վիրավորել էր։ Դեպքը տեղի էր ունեցել դեկտեմբերի 5-ին առողջապահության եւ սոցիալական ծառայությունների քաղաքային բաժնում։ Կինը իր երեխաների հետ մուտք է գործել քաղաքային բաժանմունք և երեխաների ուղղությամբ պահել ատրճանակը՝ սպառնալով, որ կվնասի իր երեխաներին, եթե սոցիալական գործակալությունը չվճարի պետական նպաստը։ Նույնիսկ կինը պատանդ է վերցրել գործակալության աշխատակիցներից մեկին, որին հետո ազատ է արձակել։ 

Առաջին անգամ Ռեյչել Գրիմըրը պետական նպաստ ստանալու համար դիմել է սոցիալական գործակալության քաղաքային բաժանմունք այս տարվա հուլիսին։ Սակայն նրան մերժել են, քանի որ նա բավարար փաստաթղթեր չի ներկայացրել։ Ինչպես հաղորդում է «The Houston Chronicle»–ը, երկու շաբաթ առաջ Գրիմըրը կրկին դիմել է սոցիալական ծառայությանը և ասել է, «ինչպես պետք է ապրեն իմ երեխաները, եթե ես մահանամ, ուստի ես չեմ ուզում, որ իմ երեխաները տառապեն»։ 

Ըստ «Associated Press»–ի՝ Տեխաս նահանգում սննդամթերքի պետական նպաստի ծրագրում ընդգրկված են 46 մլն մարդ, որոնք ամսեկան 294 դոլար գումար են ստանում։