Զինծառայողի մահվան գործով դեռևս ձերբակալվածներ չկան

Սեպտեմբերի 9-ի գիշերը Երևանի կայազորում տեղակայված զորամասերից մեկում նախնական տվյալներով ինքասպանություն կատարած շարքային զինծառայող Արման Սարգսյանի գործով դեռևս ձերբկալվածներ չկան: Այս մասին Lurer.com-ի հետ զրույցում ասաց ՀՀ ՊՆ քննչական ծառայության հասարակայնության հետ կապերի սպա Մերի Սարգսյանը:

Վերջինս նշեց նաև, որ նախաքննությունը շարունակվում է և որ ինքը այլ բան հաղորդել չի կարող:

Հիշեցնենք, որ Երևանի կայազորում տեղակայված զորամասերից մեկից ՀՀ ՊՆ քննչական ծառայության 4-րդ կայազորային քննչական բաժնում ստացվել է հաղորդագրություն, համաձայն որի 2012–ի սեպտեմբերի 9-ին` ժամը 02:15-ի սահմաններում ժամապահի պարտականությունները կատարելիս պահակային ծառայությունում հայտնաբերվել է նույն զորամասի ժամկետային զինծառայող շարքային Արման Սեյրանի Սարգսյանի դին` նախնական տվյալներով ինքնասպան եղած վիճակում: Դեպքի վայր է մեկնել օպերատիվ քննչական խումբը, կատարվել է դեպքի վայրի զննություն, այլ անհետաձգելի քննչական գործողություններ, նշանակվել են մի շարք փորձաքննություններ։

Նշենք նաև, որ փաստի առթիվ ՀՀ ՊՆ քննչական ծառայութան 4-րդ կայազորային բաժնում ՀՀ Քրեական օրենսգրքի 110 հոդվածի 1-ի հատկանիշներով հարուցվել է քրեական գործ, կատարվում է նախաքննություն (ինքնասպանության հասցնել):