Ո՞ր ՔՊ-ականներն են վենդետա իրականացնում պետական համակարգում

Հեղափոխության օրերին Նիկոլ Փաշինյանի տված գլխավոր խոստումներից մեկը այն էր, որ ոչ մի պետական ծառայող չի ազատվելու աշխատանքից, եթե, օրինակ, իր հայացքները չհամընկնեն իշխանության ներկայացուցիչների, իրենց վերադասների հայացքներին, կամ չի լինելու վենդետա իշխանությանը քննադատողների հանդեպ:

Այն, որ այս խոստումն էլ գրվել է սառույցին դժվար չէ հասկանալ, թե մամուլում առկա հրապարակումներից, թե անմիջապես քաղծառայողների գրառումներից, ովքեր հայտնում են, որ իրենց հեռացրել են աշխատանքից՝ վերադասի սրտի ուզածով չշարժվելու կամ Նիկոլ Փաշինյանին քննադատելու համար:

Դիցուք՝ Նիկոլ Փաշինյանին Ֆեյսբուքում քննադատելու պատճառով աշխատանքից ազատվել են «Բարձրավոլտ էլեկտրա­ցանցեր» ՓԲԸ-ի 3 բարձրաստիճան աշխատակիցներ՝ Վահե Մարտիրոսյանը, որը գլխավոր տնօրենի տե­ղակալն էր, Գևորգ Վիրաբյանը՝ իրա­վական հարցերով խորհրդատուն, և Գոռ Մարտիրոսյանը՝ ֆինանսական բաժնի տնօրենը:

Երեկ հայտնի դարձավ, որ սեփական դիմումի համաձայն Լոռու մարզպետարանի գյուղատնտեսության բաժնի ավագ մասնագետ Արշակ Բաղդասարյանը դադարեցնում է իր աշխատանքը: պատճառը՝ ոչ թե աշխատանքային պարտականությունները պատշաճ չկատարելն է, այլ ֆեյսբուքյան հարթակում իր անձնական կարծիքը արտահայտելը: Արշակը պատմում է, որ սեպտեմբերի 30-ից մինչեւ նոյեմբերի 20-ը կամավոր մասնակցել է արցախյան պատերազմին, եղել՝ Հադրութում, Մարտունիում, Շուշիում եւ Ասկերանում: Իսկ պատերազմից վերադառնալուց հետո իր համար ամեն ինչ այլ է դարձել, ինչի մասին էլ գրել է իր ֆեյսբուքի էջում:

Նոյեմբերի 10-ից Լոռու մարզպետարանի տեղեկատվության և հասարակայնության հետ կապերի բաժնի պայմանագրային աշխատակցին՝ Արտակ Մարուքյանին չեն թույլատրում մուտք գործել մարզպետարան։ Արտակ Մարուքյանի խոսքով` իրեն նաև Լոռու նախկին մարզպետը՝ Անդրեյ Ղուկասյանն է ասել, որ աշխատանքից ազատման դիմում գրի, իսկ պատճառն այն է եղել, որ Արտակ Մարուքյանի Ֆեյսբուքի էջում տարածվել է ոչ իշխանական տեղեկատվություն հենց այն օրը, երբ ՀՀ վարչապետ Նիկոլ Փաշինյանի, Ադրբեջանի նախագահ Իլհամ Ալիևի և Ռուսաստանի նախագահ Վլադիմիր Պուտինի միջև ստորագրվեց եռակողմ համաձայնագիր՝ Արցախի հողերը հանձնելու մասին։

Հանրային հեռուստաընկերության երկարամյա աշխատակից Հրաչյա Պապինյանը ֆեյսբուքյան իր էջում տեղեկացրել է, որ մարտի 1-ին արած իր գրառման համար իրեն ազատել են աշխատանքից:

Ոստիկանության սպա Ալբերտ Ունուսյանին ազատել են աշխատանքից Փաշինյանի քաղաքական հակառակորդի ծնունդը շնորհավորելու համար:

Փաշինյանի հրաժարականը պահանջելու համար աշխատանքից հեռացրել են Վանաձորի թիվ 3 պոլիկլինիկական հիվանդանոցի տնօրեն Արտակ Եդոյանին: Զրույցի ընթացքում նորանշանակ մարզպետ Արամ Խաչատրյանը, որը, մինչ գործադիր տեղափոխվելը, «Իմ քայլը» խմբակցության պատգամավոր էր, թեման քաղաքական դաշտ է տեղափոխել, Եդոյանից հետաքրքրվել, թե ինչո՞ւ է դեմ Փաշինյանին։ «Մարզպետն ասաց՝ նախկին իշխանությունների ժամանակ կարո՞ղ էիք կարծիք հայտնել։ Ասում եմ՝ այո, եւ օրինակ բերում, որ նախկին մարզպետի ժամանակ քաղաքական խնդիր եմ ունեցել, ազատ արտահայտել եմ իմ տեսակետը։ Կարծիք հայտնելու համար նախկինում երբեք նման փաստի առաջ չեմ կանգնել»,- նշել էր բժիշկը։ Հիշեցնենք՝ Հայաստանի բժշկական համայնքի ներկայացուցիչները հայտարարություն էին տարածել՝ պահանջելով ստեղծված աղետալի վիճակի համար պատասխանատու՝ վարչապետ Փաշինյանի հրաժարականը եւ նրա կառավարության ինքնակամ ու անցնցում հեռացումը:

Ոստիկանության ավագ լեյտենանտ Հայկ Սարգսյանին կադրերի ռեզերվ են ուղարկել երկրորդ նախագահ Ռոբերտ Քոչարյանի գրառումը լայքելու համար:

Պատերազմից անմիջապես հետո բազմաթիվ տարիներ համակարգում աշխատած սրտաբան Լամարա Մանուկյանը այն ժամանակվա առողջապահության նախարար Արսեն Թորոսյանի կողմից ազատվեց աշխատանքից միայն այն պատճառով, որ անվճար բուժօգնություն էր տրամադրել Արցախից ՝ Հայաստանում ապաստանած ընտանիքներին:

Ինչպես տեսնում ենք՝ Փաշինյանը և իր թիմակիցները մոռացել են նաև այս խոստումը և պետական համակարգում տեռորն ու վենդետան շարունակվում են անգամ հեղափոխությունից շուրջ երեք տարի անց...