Լիբիան զինամթերք է մատակարարում Սիրիայի ապստամբներին

Լիբիան մեծ քանակությամբ զենք-զինամթերք է ուղարկել Սիրիայի ապստամբներին: Բրիտանական The Times-ը սեպտեմբերի 14-ին հաղորդել է, որ զենք մատակարարող նավը խարիսխ է գցել թուրքական նավահանգստում, որտեղից էլ շարժվել է դեպի Սիրիա:

Թերթի աղբյուրների տվյալներով՝ Լիբիան ընդհանուր առմամբ ուղարկել է 400 տոննա ռազմամթերք` հրթիռներ, ձեռքի հակատանկային նռնականետներ, հումանիտար օգնություն և դեղամիջոցներ:

«Այս օգնությունը կարող է արմատապես փոխել իրադարձությունների ընթացքը, եթե այն ճիշտ օգտագործվի». The Times-ին հայտնել է Սիրիայի ազատ բանակի անդամ Աբու Մուհամմեդը: Նա նաև հայտնել է, որ սա հանդիսանում է զենքի ամենախոշոր խմբաքանակը, որը երբևէ ուղարկվել է Սիրիայի ապստամբներին սիրիական հակամարտության ընթացքում:

Պարբերականի թղթակիցները հաղորդում են, որ նավատորմի անդամների պնդմամբ` իրենք մի քանի շաբաթ բազմաթիվ փաստաթղթեր են ստորագրել ճանապարհը շարունակելու համար: Այդ ընթացքում բազմաթիվ խմբավորումներ Թուրքիայում, այդ թվում` «Մուսուլման եղբայրները», փորձել են խլել նավի բեռը: Արդյունքում տեղ է հասել բեռի 80%-ը:

Լիբիայում Մուամար Քադաֆֆիի տապալումից հետո երկրից անհետացել էր մեծ քանակությամբ զինամթերք: Պաշտոնական անձինք հայտարարել էին, որ անհետացել է «Երկիր-օդ» անվամբ ավելի քան 5000 հրթիռ:

Լիբիան նախկինում էլ է փորձել զենք փոխադրել Սիրիա, սակայն այդ փորձերը կանխվել են: