Ֆրանսիայի հայերը Ադրբեջանի նախագահին բողոքի ցույցերով կդիմավորեն

Սեպտեմբերի 18-ին Ադրբեջանի նախագահ Իլհամ Ալիևի՝ Փարիզ այցի օրը Ֆրանսիայի հայերը լայնածավալ բողոքի ցույց կկազմակերպեն Ադրբեջանի դեսպանատան առաջ. հայտնում է Regnum-ը։ Հայաստանի Սփյուռքի նախարարության Եվրոպայի հայկական համայնքների բաժնից հայտնել են, որ հայերը, չհաշտվելով ադրբեջանա-հունգարական գործարքի հետ, շարունակում են արտահայտել իրենց դժգոհությունն ու բողոքը։

Ֆրանսիայի հայկական կազմակերպությունների համակարգող խորհրդի նախաձեռնությամբ` վերը նշված ցույցին կմիանան նաև հայեր Լիոնից, Մարսելից և այլ ֆրանսիական քաղաքաներից։

Հիշեցնենք, որ 2004 թվականի փետրվարի 19-ին Բուդապեշտում ադրբեջանցի ոճրագործ սպա Ռամիլ Սաֆարովը կացնահարեց Հայաստանի ԶՈւ սպա Գուրգեն Մարգարյանին քնած ժամանակ: Սպաները Հունգարիայի մայրաքաղաքում մասնակցում էին անգլերեն լեզվի դասընթացներին ՆԱՏՕ-ի «Գործընկերություն հանուն խաղաղության» (Peace for Partnership) ծրագրի շրջանակներում: Հունգարիայի դատարանը դատապարտեց Ռամիլ Սաֆարովին ցմահ բանտարկության` առանց ներման իրավունքի առաջին 30 տարիների ընթացքում: Ադրբեջանի «հերոս» ճանաչված մարդասպանն արժանացել է նաև մայորի կոչման, բնակարանի ու նյութական փոխհատուցման: